唔準諗，即刻答，十個新郎哥十套西裝乜嘢顏色多? 相信大家都係答「黑」。點樣可以喺一眾都係著黑色西裝嘅兄弟、酒店部長同賓客入面突出自己係主角? 今日就教大家點樣喺顏色、身型、身高、款色同場地等各個元素配合下，瞬間成為耀眼主角！
文：婚享會編輯部｜圖：網上圖片, Carmine Wedding Dress & Suit
01. 身型、身高：小心顯肥！
結婚呢個大日子，莫講女士，其實男士都一樣會做運動keep fit，但往往披左件西裝褸之後，個人就好似縮細左一個圈咁，所以揀男禮就要好小心喇！身型比較有肉地嘅男士，盡量唔好著啲比較鮮色嘅西裝，例如係紅色、黃色，因為鮮色會令人視覺上望落橫啲。但相反瘦底嘅男士就唔好揀啲相對貼身嘅款色，如果唔係視覺上就好易變成竹籤，分分鐘瘦過新娘子就唔好睇喇。另外矮細嘅男士要留意，試過有人因為貪靚，揀左蝙蝠袖，諗住好型成個賭神咁，點知影相出黎就矮左成個頭，真係慘慘豬… 所以揀男禮絕對要睇住自己嘅身型去配合咁先Good Fit 㗎！
02. 顏色、款色：告別黑白灰！
「黑、白、灰」平時都著唔少！但大日子又要型又要突出，係時候要拋開呢啲沉悶嘅顏色喇！其實近年大吹韓風同英倫風，顏色上嘅選擇已經愈嚟愈多。好似同黑色一樣咁穩陣嘅深藍色配襯卡其色褲或同色西褲，又或充滿外國風情嘅百搭啡色配灰色，都一樣穩陣得嚟又搶鏡！
有喜慶感覺，又唔會俗套嘅酒紅色，都係搶眼嘅配搭。
款色嘅選擇方面，男禮已經進化到好多Details，等人一望就注視到新郎哥。例如：質地上，個人推薦女性常用嘅布料，其精緻度同Details都比男性布料多選擇，唔再局限於斜間或暗紋。若果婚期喺年尾嘅話，天氣涼涼地，就可以選擇相對厚身少少嘅針織馬夾，而格仔紋嘅西裝亦係經典款式呢！
03. 小配件：造型小亮點
另外小配件亦不容忽視，好似鈕扣、煲呔、領巾、呔夾同帽等，多個吸睛位亦唔太浮誇。另外，亦可試用唔同嘅布料去做配搭，新潮之餘亦呃到唔少LIKE呢！
04. 場合
顏色、款色揀好之後，唔好以為就萬無一失。因為配襯場地亦都係非常重要，例如：你唔會選擇著住尾燕服喺沙灘證婚一樣，避免「對的衣服，遇著錯的場地」! 新郎們，記緊以下TIPS呀！
A. 田園風 – 近年大熱主題
若果於大自然搞婚禮，新郎哥可以選擇一啲相對輕鬆同淺色嘅西裝配搭。而下身亦可以配襯淨色波鞋，輕鬆自然咁享受樹木同綠草嘅清新氣息。
B. 教堂式
神聖同莊嚴嘅教堂係唔少新娘子自幼幻想嘅結婚地點，所以新郎可以揀一啲比較斯文同莊重嘅款式。如：燕尾服、韓式禮服亦相對適宜。
C. 酒會式
恍如身處外國場地嘅酒會，近年深受唔少新人嘅喜愛，可以輕輕鬆鬆同最愛嘅親朋好友狂歡傾計，所以禮服上面嘅元素就可以傾向英倫風嘅Casual wear，甚至可以玩味感重一啲都得！
05. 循環再用
講到呢到，就算揀幾靚幾突出嘅西裝都係結婚當日用，好多男士都會拋出一句：「之後都用唔番，唔使搞咁多野啦，簡單咪得囉！」有見及此，而家好多鋪頭設有修改禮服嘅服務。只要新郎哥係訂造西裝前，同負責人講想件禮服日後著得番，佢哋就會將恤衫預先加一啲鈕扣，方便完婚後將禮服嘅蘋果領改為活動領。若果你著日式燕尾服，日後亦都可將後面的剪裁裁返短，咁就唔會做成浪費喇！
✨籌備婚禮由此囍✨全港最大的婚禮評語網站 Bespoke Wedding 婚享會，集齊最新結婚資訊😍即睇每月精選結婚優惠及獨家非凡禮遇🎁兼賺里數換蜜月機票攻略： www.bespoke-wedding.com/
