精選網誌

【讓結婚加分的4個小細節】 婚禮準備事項 避開地雷和尷尬|一定會出現 Out Of The List 嘅人物

Back to top

2021年11月01日 12:37:41

讓結婚加分的4個小細節

婚禮前一個又一個Excel檔,咩Budget plan呀、To do list呀、當日Rundown、影相list等等...相信新人們已經見慣不怪。但往往幾努力去籌備,大日子總會有意想不到嘅亂子出現!究竟有乜野事我地喺之前可以處理得好啲,令到當日嘅混亂同尷尬可以盡量減低呢?新人們!Check it out!

 

撰文:駐場Blogger - 人妻搜記|圖片來源:網上圖片 

1. Big Day當日,兄弟姊妹無得坐又無得食?

喺大日子前,我已經向酒樓Book定左一圍枱比兄弟姊妹以及化妝師,攝影師等人用Lunch。因為我證婚嘅地點係酒樓附近,所以我喺出門後、入門前,就已經先請部份兄弟姊妹先到酒樓食Lunch,佢哋先嚟先食定嘢,等另一批兄弟姊妹同工作人員嚟到,佢地就去證婚地點幫忙佈置,我諗住「咁精密嘅計劃!仲唔掂?」點之問題就出現喇!!!

當我去到酒樓,就即時畀媽咪話我安排得好差!原來大家都無位坐!事源女家帶埋幾位女家嘅親戚朋友嚟咗,而男家又突然多咗幾位唔識嘅朋友一齊嚟,最後要姊妹即場Book多兩圍先啱啱好夠坐,最慘係伴娘又無得食,除左不停抱歉之外,我都唔知講啲乜....

 

讓結婚加分的4個小細節

貼士:

務必喺婚前問清楚哂屋企人究竟幾多個會嚟酒樓一齊食Lunch,原理就好似夜晚擺酒嘅座位表一樣,如果唔係到時你眼望我眼真係尷尬到暈。另外,如果酒樓方便嘅,可預先Order食物,以方便兄弟姊妹及工作人員用餐。

讓結婚加分的4個小細節

2. 敬酒環節,敬極都未敬完?

我知道好多新人都好醒目,喺婚前已經做好敬茶LIST,但往往喺大日子當日,最易出事嘅就係敬茶環節,因為敬茶人物Out Of The List!好似我婚前一日,已經再次同四大長老夾好敬茶List,但喺大婚當日,名單上有名嘅又遲到,無名嘅又因為奶奶突然話要敬老人家,媽咪又話有個長輩買咗金器所以要敬,結果開席時間遲完又遲,同賓客互動嘅時間更加係零。

讓結婚加分的4個小細節

貼士:

不厭其煩地同四大長老夾敬茶名單!禮貌地設定Deadline,請需要敬茶既長輩喺Deadline前完成儀式。請父母同兄弟姊妹或MC好好溝通,如當日知道有Out Of The List長輩一定需要敬茶,就要計算好時間,以免錯失與賓客交流機會,呢個真係一世遺憾嚟㗎!

讓結婚加分的4個小細節

3. 酒席上,點解我無位坐?

座位表對我嚟講,肯定就係搞婚禮最複雜嘅一環!爸爸會話XX親戚又唔可以同ZZ親戚一齊坐,老公又會講A朋友想同B朋友坐... 最後,我喺大日子前用咗2星期砌個座位表出嚟,亦因為我擺酒嘅地方有一個大嘅電子屏幕,我就諗住將座位表電子化,等大家嚟到用手指Touch下就知自己坐邊。點知响我準備Match in嘅時候, 見到堂家姐抱住BB,推住架車企左响Reception同我講話佢無位坐,話原來佢原本坐既位置已經坐爆人,而當時兄弟姊妹又要忙住同我地一齊跳舞Match in,所以無人幫到佢Check。果刻我真係極度唔好意思!後尾我先知原來好多親戚朋友係唔識用屏幕睇,咁岩我地全部人又行開哂,所以大家就隨便坐。

讓結婚加分的4個小細節

貼士:

就算而家好多酒店或者擺酒嘅地方都有提供電子座位表都好,新人們記得一定要印定一個Hard Copy喺Reception!如果入席前嘅高峰時段,點都請最少一個兄弟、姊妹或者兩邊嘅其中一位屋企人長駐Reception,幫忙招呼同帶位!唔好好似我地咁令大家感覺招呼不周!

讓結婚加分的4個小細節

4. 點解你有泊車優惠但我又冇?

我擺酒嘅酒店有免費泊車優惠,總共36個鐘,其實我同老公事前已經分別問咗男女主家有幾多人會揸車嚟,分別安排幾多個鐘。喺結婚當晚,我地亦安排咗兄弟姊妹逐圍問邊位賓客有揸車,係散席前就派發泊車卷,但係可能大家果晚太開心,一知道有免費泊車就一窩蜂衝向兄弟姊妹度拎,根本係完全唔夠分!而奶奶最後唔想得失賓客,亦自己比錢出嚟包咗其他客人嘅車費。

讓結婚加分的4個小細節

貼士:

我覺得呢啲情況真係比較尷尬,畀又唔係、唔畀又唔係,所以大家一定要揸緊自己嘅底線,只派比兩家事前默許咗嘅人,其他唯有禮貌地解釋車卷已派完!如果唔係,大家真係多多都唔夠畀!

讓結婚加分的4個小細節

 

 

仲想睇多啲婚禮籌備懶人包嘅文章?快啲Click入嚟睇啦!
weddingplanner

 

籌備婚禮由此囍✨全港最大的婚禮評語網站 Bespoke Wedding 婚享會,集齊最新結婚資訊?即睇每月精選結婚優惠及獨家非凡禮遇?兼賺里數換蜜月機票攻略: www.bespoke-wedding.com/

gif