我喺黃埔Club One擺酒，主要嗰度比較就腳同埋平啲，冇酒店咁貴，酒店最低消費都要三四十萬，所以就唔考慮去酒店。呢間我地平時都有去飲茶食飯，佢service同食物質素比其他Club One好。不過一開始想搵人問詳情，佢地好似好忙，啲人好難搵。我地係直接上去睇場問日子同幾多錢，佢地就好似好趕咁，可能個場又要俾人，所以都冇辦法，如果時間鬆動啲啲會好啲。 當日嘅食物質素ok，大部分賓客都話食物好食，但係聽聞有一兩圍啲侍應service差少少。另外，音響方面就麻麻，有啲賓客講番就係坐後面嘅唔係幾聽到，不過當時我自己都顧唔到咁多。新娘房都幾private，有個廁所可以俾我換吓衫，有個架掛衫咁。場地嘅衛生程度都係okay。 另外，佢哋個wedding planner Icy都好幫到手，佢係俾完二訂三訂先接手，之前係另一位同事。我地搵佢傾流程佢都俾到個啱嘅suggestion我，例如點樣進場﹑進場儀式嗰啲我地都冇咩idea，佢就俾到好多意見我地，仲介紹左個backdrop公司俾我地。 價錢都係合理嘅，不過加圍數佢之前就冇同我講要計人頭，後尾佢先解釋番，因為我地自己加圍數都加得好趕，例如張枱係十二個人我地就臨時加一個，點樣計條數佢之前冇同我講，係我地問佢佢先講番，可以早啲講番就好。另外，如果音響方面可以改善一吓，不過其他整體我都滿意。

我哋係喺Club One黃埔度擺酒，主要係因為奶奶要求好近地鐵站出口嘅地方，而Club One黃埔就喺正地鐵站樓上。我都係喺婚展度認識到Club One，不過講真我覺得行婚展真係唔易睇啱嘢。因為我當時喺婚展其實都問過城市花園酒店夜晚擺酒幾錢，但個Sales無覆返我，我覺得你都唔care單生意就算啦。雖然我自己住城市花園附近，但最後都係揀黃埔近地鐵站，最緊要老人家開心。 不過，我覺得Club One其中一個令我唔太滿意嘅地方係佢哋做生意有啲tricky。因為我哋睇Catalogue嘅菜單同contract嘅菜單竟然係唔同，簽嗰刻個Sales又無提醒我哋。之後，佢就話菜單係根據合約後面啲內容，catalogue唔係最update。我自己覺得有啲俾佢哋fake咗，因為份catalogue攞出去sell連新開的店嘅地址都有放埋，菜單應該唔會唔update。而且合約後面細則嘅菜單係印到朦朦地，令我覺得佢哋喺呢個係唔誠實咁做生意。我當時知道之後都無得揀，因為都俾晒訂。其實搞婚禮，錢都預算俾，如果佢哋誠實啲講返清楚係咁就會好好多。 至於當日嘅服務、好在overall都ok，係新娘房感覺比較窄。雖然都可以企到10個人，但放埋啲物資之後就真係無乜位剩。我知道club one 觀塘嘅新娘房相比下就大好多。另外，新娘房通常有個夾萬俾你放金器，但嗰個夾萬係可以成個搬走的，感覺唔係好安全，踢都會移位。食物同影音方面都無咩問題，整晚婚宴都順利嘅！