初時上去見到Kenji嗰時，我覺得佢感覺都cool cool地，但其實佢都好有禮貌，又喺run down上俾咗好多意見我哋。佢俾我哋睇咗好多佢之前影嘅style同埋同我哋傾吓想影啲景點同埋手法，都好清楚。 Big Day嗰朝我喺石門Courtyard by Marriott度出門，佢嚟到嗰時我化緊妝，佢同我打咗聲招呼之後就好快咁去準備影相。我無請到大妗姐，斟茶嗰時佢都有幫手講啲好聽既話，佢又好識得搞笑，令到個氣氛好好，啲親戚個個都好開心。我記得聽到大家好多笑聲，而我爸媽都話佢搞氣氛好好！我哋仲有喺酒店度影咗一啲室內相，因為之前傾嗰時都有同佢講想喺酒店咩地方影相，特別喺酒店大堂，我覺得好靚好鐘意。當日佢都影到晒我之前提過想影嘅地方，而且都影得好靚好滿意。 由於我哋夜晚喺The One 20樓擺酒，傾run down嗰時Kenji佢睇完我哋出門酒店同擺酒地點嘅路線之後就提議我哋不如去西九海濱長廊嗰度影啲外景，睇得出佢都真係好主動咁為我著想，唔會話自己做完就算。嗰日好難得我哋成班兄弟姊妹團可以一齊玩，好開心，所以好多謝 Kenji 呢個提議。 Kenji 夜晚主要負責影snapshot，而後來我外母同我講返話有段時間Kenji本來係影緊個candy corner，但佢聽到我外母話想叫佢幫手影吓相都即刻去幫手，我外母都讚佢服務好好。除此之外，大家都知道當日都真係好忙，我老公都時時顧住其他嘢都唔記得自己衫亂咗，Kenji 就不時幫我老公執返正套衫等佢影相好睇啲。當晚佢哋幫我哋整嗰條片真係好多人讚，個個都話條片拍得好好，唔會悶同埋感覺到好開心。我幫襯埋即晚派相，都好順利。 我真係好多謝Kenji，佢唔止幫我影咗好多好靚嘅相，仲幫我執頭執尾。夜晚嗰時我哋圍數好多都有啲亂，佢就同個場地經理同埋MC傾好點樣安排親友影相，好順暢。 “多謝晒你，Kenji！"

幫襯Kenji影完pre-wedding見佢影得幾好，都對佢有啲expectation，但可能因為Pre Wedding 真係太好，Big Day反而好似相比下有啲落差。例如有啲衫佢原來冇幫我影到全身look，而我就只係得我當時化妝師幫我影嘅唯一一張留念。另外就係跟相都有啲慢，確實都預咗，因為都好明白近年尾每一個攝影師都好忙，所以催攞相都有心理準備要催幾次。當時因為真係好想俾相人，而我哋都有經whatsapp問佢可唔可以先俾咗啲團體相我哋先（始終諗住嗰啲都唔駛點執），咁當時佢係whatsapp到應承咗我哋嘅，但係過咗一段時間就冇咗回事。我老公問要唔要再催佢，但我心諗都係唔好催喇，始終可能處理相片係要花時間，萬一我哋催佢而佢為咗趕俾我哋而執得唔係咁好咪仲唔好？ 所以都最後都係由得Kenji自己處理，最後都好似要四﹑五個月先有得攞，點都好，最後都好在响新年前攞到。 我哋有買埋即時派相服務，本身我哋已經安排咗開席前嗰啲group photo會有即時派相服務，但係如果開席後都要group photo 而都要即時派相的話就要再加$800喇。我哋都agree咗個附加費既，但係我好多朋友都話番俾我知之後佢哋開席後嗰啲group photo都冇俾到相佢哋。記得當時都有問過Kenji佢哋係咪派晒啲相，佢哋都話係派晒，但係後來聽到朋友話無收到相都好無奈，始終真係無得拗，件事始終都係過咗去，不過如果呢部份可以跟緊啲就會更好。 中間有段小插曲令到我屋企人都唔係咁滿意，就係晏晝食飯嘅時候我哋係安排大家一齊去酒樓食飯，而其實都有將呢個 detail 响rundown裡面。當時我啲親戚都有話攝影師們都有放啲equipment落去。咁既然equipment都响到，就當然預佢哋會嚟食，點知到最後佢哋冇出現，之後佢哋同我講佢哋出咗去McDonald食，仲俾番張單我claim錢，雖然張單就唔係多錢，不過喺酒樓嗌嘅嘢本身係預埋佢哋，浪費咗咁多食物就始終唔係咁好，所以如果响溝通方面可以做得好啲就更好。 最後都想讚吓佢哋當日佢隊crew有位攝影師真係好好笑容，又會搞吓氣氛，講啲好說話逗大家開心，而我覺得呢啲真係做婚禮攝影師非常應該有既服務態度。