我同老公都唔太喜歡喺婚禮播成長片段，上網見到Dino website嘅concept video拍得好好而我哋都好鐘意。加上我哋本身嘅wedding喺以黑白色為主，所以想做一條氣氛fun啲開心啲既concept video帶出一個開心既感覺，所以唔太需要啲浪漫嘅video處理手法。 初頭見Dino時好記得大家都未warm up，仲建立緊信任，所以大家都比較formal同拘謹，不過同佢傾完之後覺得要搵既人就係Dino而都真係唔再需要搵其他人。同Dino傾既時候佢會俾我同老公分別講返大家鐘意啲乜嘢而唔會刻意要我哋定一個主題嘅。傾完之後Dino都回俾空間我哋去思考，直至後期將近拍攝先再大家決定內容同拍攝手法。 我哋條片有部分係响沙灘影既，計埋Dino佢哋成crew都出咗三個人。因為之前已經溝通咗而感覺Dino已經計畫好要點錄，我哋都唔需要問而佢已經會好好咁指導我哋點做，我哋就只係配合佢就得喇。好深刻記得當日Dino為咗影個日落景，佢為個shot做既準備同等嗰個最完美一刻日光前後都用咗成半個鐘。我當中絕對無覺得佢徙時間，反而見到佢真係好用心咁去研究日落光線點樣打落嚟先影得我哋最靚，呢啲真係好考technique，唔似得嗰啲每個鏡頭都係大頭或者兩個人攬住嗰啲就話係sweet既作品有得比既。宜家回想返當日拍攝感覺真係好好，而我同我老公都好滿意。

我原本在網上搵到另一個合心意的攝影師，但因為他沒有檔期，於是他介紹了Dino Wong給我。婚禮前，我們有親身上去他的office相討婚禮當天的安排。 婚禮當天，Dino同埋佢隊crew準時到達，表現亦十分不錯，喺咁擠迫的環境都影得幾好(因為我屋企唔係好大又有成三、四十人)，我哋睇返cut出嚟嗰段片都十分滿意。而晚上我們在馬會擺酒，他拍攝的角度攞得好好，影得好靚！ 當晚我在婚宴散席後仍然要向一些長輩敬茶，他和他的同事雖然十分疲累，但都冇催我地，佢哋都好願意等我們敬完茶才收埋d尾數，態度值得一讚!