Dino喺朋友介紹俾我嘅，喺咁同我講話「佢好得架！」。我同我先生約咗去佢studio傾，第一次見佢嘅感覺係佢真係好怕醜！明明對佢嚟講應該喺一盤生意嚟，但佢又唔會sell妳，又唔會好似其他攝影師想做我生意咁喺咁氹我，總之就係好怕醜，好斯文！佢俾咗啲之前影落嘅sample我哋睇，覺得都唔錯，之後亦都唔需要問太多嘢，加上唔想再搵其他人，所以即時就成交咗。 可能因為佢有航拍機，佢影嘅風景好似帶出咗成個故仔咁，而且Bigday當日輯錄嘅片好touching！明明我都冇講過俾佢聽，但唔知點解，佢就會將一啲對我嚟講好重要嘅嘢擺咗入條片裡面。例如我同老公宣誓嘅誓詞會隨住音樂出嚟，而對我嚟講一啲好重要嘅親人亦都有喺片段裡面出現！仲有就係，Bigday朝早嗰陣我哋安排咗响屋企樓下玩新郎，咁啱我有一戶親戚都住响同一個屋苑。咁好啦，當我親戚知我哋會玩新郎，佢哋就係樓下徘徊睇我哋點玩。而到咗夜晚播片，佢哋成家人竟然都有响條片出現！可能Dino估到呢家人夜晚會嚟飲，所以特登放埋佢哋入去，所以覺得真係Dino好用心，真係會留意我哋同各人既互動而加啲賓客入條片裡面。另外就係之前同Dino講過我好鐘意狗狗，而佢又真係記得幫我放入條片。加上我都冇特別提過嘅嘅家人、兄弟同埋姊妹全部响條片入面都有露面，呢啲全部都係令我好surprise嘅位！ 除咗拍攝之後佢另一方面都好犀利！當日我哋响草地拍片嗰陣，咁啱我著嗰件婚紗入面嗰鋼爛咗，有條鐵叉咗出嚟！我即時諗：“唔掂喇！！！” 而係我哋唔知點好嘅時候，Dino竟然幫到我哋整返好條裙！呢啲其實真係唔係佢份內事，但佢又肯做，真係好多謝佢。 老實講，Dino嘅價錢係比出面貴，出面嘅價可能係二萬幾蚊包已經包咗影相同埋video，但Dino淨喺拍片都已經要收＄13800。同人講親聽到嘅feedback都係話「好貴！」。但影嗰朝見到佢帶嚟嘅架撐，再加埋夜晚睇到條片，我覺得係：“冇－嘢－好－講”，因為呢筆錢真係俾得過！我先生都話佢好得，而我自己就覺得我呢條片就其實靚過哂之前Dino俾我睇過所有其他新人既Sample喇！ :) 我唯一要俾Dino嘅comment係希望佢唔好咁怕醜，因為佢真係太斯文。影相當日佢見到間酒店幾靚，就叫我兩公婆去影，但佢指導我哋擺pose嗰陣係細聲到乜都聽唔到！要佢助手嗌返轉頭指示我哋要點。不過我又覺得，呢個咁斯文怕醜嘅就喺Dino自己囉，都唔洗一定要改。佢真喺好用心做事，對我哋好好，感覺亦好舒服。 婚後第嗰朝我send咗whatsapp俾佢，話好多謝佢幫我影video，同埋盛讚條片靚過哂佢之前拍嗰啲。跟住佢好搞笑，好平淡咁係 whatsapp 覆我一句 “Thanks”，連公仔Emoji都冇！但我又唔會覺得佢好招積或者高竇，只係覺得佢好善良同埋真心，因為Dino就係一個咁既人。 咁啱睇開Dino既Facebook, 發現 Dino 自己只係早我哋一個星期結婚，而佢又有upload自己條片俾人睇。Click 嚟睇完真係冇嘢講。。。因為真喺拍得 “非常好“！！心諗佢自己結婚條片當然要最靚，當然亦都都唔會妒忌啦！。佢係响Bali 結婚，影咗好多好靚嘅風景，而我就覺得有部分應該係佢自己拍返都唔出奇，因為佢一向鐘意用航拍機，可能真係得有佢自己樣嘅shot先至唔係佢自己影既。。。 最後都真係想再一次好多謝你呀Dino，亦祝福你婚後幸福快樂！

本身諗住bigday嗰日唔需要錄影，但後尾都想keep返memory，加上又plan咗啲好好笑嘅結婚遊戲，所以就諗不如都拍埋video。因為我搵咗嘅Bigday攝影師好fresh，喺影wedding嘅新手，好有性格佢哋話唔拍video，所以就搵咗DIno幫我拍。 可能Dino又真係响行內好有名氣，結果當我話俾佢哋聽我當日Video搵咗Dino幫我影佢地即刻雙眼發光！！結果當日真係見到佢哋不時跟咗Dino去學嘢，而表現方面Dino真係相比攝影師真係好好多，始終有無經驗比較起來真係差好遠。Dino好細心，就連影酒店嘅光線角度都留意到佢好用心去調教先開始拍攝。後來見到既影片非常好，所以我好記得上台都忍唔住講俾Dino聽我好感激佢。 最後就係新娘如果要搵人拍Video，我認為最緊要喺搵返啱你自己嘅videographer，而唔係隨便聽人講而唔問詳情，要認真諗清楚自己條片想影到同錄到啲乜嘢。