（聯邦郵輪宴會中心） 揀呢度嘅原因喺因為我哋plan咗去郵輪碼頭影相，因為唔想兄弟姊妹走嚟走去咁辛苦，所以索性喺嗰到擺埋，咁樣影完相就可以去換衫食飯～我都睇咗好多間，但因為呢到個場同價錢都OK，交通雖然唔方便但亦有接駁巴士，我見又解決到呢個問題，亦冇聽到賓客話入唔到嚟，所以我諗佢都真喺有做到。只喺臨尾唔可以太晏走，差唔多11點半會冇車搭，但我哋都好好彩趕到。 不過，呢度嘅職員真喺好好！佢哋嘅職員全程帶住我哋，因為我哋冇wedding planner，佢哋就會有PR跟住我哋，令我哋成個過程都好流暢！可能因為呢度比較偏，以我所知唔會好full，所以我每次有咩問題打過去，佢哋都唔會好hea，反而會盡力幫我，都可以算喺即刻覆！ 嘢食都算好味，聽到朋友話唔錯。我嗰晚好忙，但問返朋友佢哋個個都話OK同好味嘅！

（聯邦郵輪宴會中心） 我哋喺婚紗展搵到啟德郵輪碼頭，本身佢唔喺on我哋張list，但因為我哋得九個月時間籌備，加上我哋好忙，到十一月先開始搵酒樓，所以想要嘅酒樓好多都冇哂位。就算有嘅話，例如Club One，得返嘅場都好差，有兩條柱喺到，去睇個場嗰刻亦好失望。去到好迷惘嘅時候有個姓潘嘅女仔走嚟sell我哋，唔介意我哋say no或者拒絕佢，個態度都幾OK，所以就去咗聽介紹。郵輪碼頭個場夠新，我自己好驚有俾錢但又污糟嘅情況，因為覺得新場污糟極有限，又覺得郵輪碼頭地方夠特別都唔錯，又唔會唔知道喺邊，加上覺得酒店嘅食物質素未必有guarantee，所以都決定咗喺呢到擺酒。佢哋都知地點有少少麻煩，所以會包三班shuttle接賓客。 嗰日有啲員工可能太後生，唔識主動幫手，例如影相嗰陣唔會主動搬櫈。其實佢哋唔喺偷懶唔想做，只喺欠缺經驗，同埋有啲害羞，所以覺得都OK。結婚之前嘅招呼好好，而且完咗婚禮成四個月咁耐，上星期我去飲茶啲員工竟然仲認得我哋！我當日扮得咁靚，而嗰日飲茶咁烏烏wei wei，竟然仲有起碼有兩三個人認得我哋。 大概8500一圍，嘢食屬中上，但又唔可以講超級好味。佢哋嘅大電視冇得頂，油同暗瘡都出哂嚟，好高清！個場附近嘅環境好靚，新人可以去嗰到取景影相，有草地、園景又有海景，可以影到好多靚相。雖然地方有少少麻煩，但賓客一家大細去飲嘅話，可以早少少同小朋友去影下個景，或者行下公園，會有意外驚喜：）