我覺得個攝影師佢其實係好嘅，但係就有少少太有主見.......有啲動作佢想我做得好啲，佢就叫我：再擰多少少！條腰再擰多啲就瘦架啦！我知道我個人係有啲漲嘅，但其實我著住套褂都好難再擰，結果係呢啲位都浪費好多時間。而且我朝頭早著褂嘅時候，佢就掛住影我攬住條褂，搞到之後兄弟啲相就影唔到，覺得佢安排嘅時間好極端。

當日我媽咪就比較激動，一嚟到就爆喊，我就叫攝影快啲影完唔好停留係我媽咪度，但係攝影師就話好溫馨呀！就不停叫我媽keep住喊，又話聽唔到我媽同我講嘅嘢，就叫佢再講多次，repeat再repeat.....成日叫「媽媽再嚟多次呀！好感動呀！」但係其實我就唔想媽媽咁辛苦爆喊......然後到戴金器嘅時候，攝影師就完全無比時間我媽媽講下嘢，而其實我媽媽係想慢慢親手幫我戴，但攝影師就係咁就叫啲兄弟姊妹幾對手咁快啲幫我，成件事真係好混亂。個陣有幾對手鐲，大妗姐就話要用啲紅繩綁住一齊，攝影師就話唔洗，叫我地是但用條金鏈繞住，但係最後條鏈就唔夠長，大家都好無奈......

當日我先生有隻戒指，係開口嗰種金戒指，帶上去嘅時候有啲緊。攝影師又話：哎！呢啲等我嚟好易嘅啫！根住佢就好粗暴咁樣整開佢，搞到隻戒指由圓形變咗橢圓形，我先生就好不滿！而且當日都有好多程序佢有意見，好多情況都有磨擦。例如拋花球嗰度，我拋完佢就話：拋完啦走得啦！我原本係想補多兩三張相，但佢就已經托住部機走到老遠...... 雖然我知道時間係好急，但係其實影多兩三張相應該好快啫！好彩有佢個副手理我地、幫我地影。我有時仲要我啲姊妹拎手機出嚟幫手影，攝影師就好唔耐煩咁。然後有樣真係比較尷尬，啲親戚朋友喺度嘅時候問可唔可以幫手影兩張，但係主攝影師好似準備收工咁，竟然全部推走哂.......

我地揀Ocean Wedding Service係因為有朋友介紹話幾ok～但我自己幫襯完就覺得佢地啲衫真係唔係好得，好大陸feel，好似一層層蛋糕咁.... 我真心覺得淘寶仲靚過佢地！而且佢地啲衫灰灰黃黃，個裙擺睇落係黑色，真係唔夠乾淨！後來知道啲裙係佢地自己洗，所以洗唔乾淨，真係忍唔住要爆炸！男禮就好少少，所以我老公都揀到衫，但女仔嗰啲真係唔得，最後我都因為覺得啲衫太核突，所以唯有自己出去買。後來我地拎衫個陣，佢地比個好似垃圾箱咁既箱裝衫比我老公！我見到咁真係忍唔住直接搵佢地老細話咗佢地一下！搞到我去輕井澤影相之前個晚要自己去燙衫！！ 我地喺日本影相其中有啲景點好遠，要幾個鐘車程。不過我件婚紗太緊，著咗之後我坐係度係透唔到氣，一上車15分鐘之後就嘔，但原來下一個景點我係唔需要著個件婚紗～！我覺得如果個化妝師可以細心啲，早啲同我講之後係要著咩衫影，咁我就唔洗著住件婚紗成個車程咁辛苦。 雖然佢地啲衫真係唔得，不過當日佢地幫我地影相都影得好好，影相質素係ok～u3000揀相方面佢地都將所有相既檔案都比返曬我，所以呢樣都ok～