我哋prewedding都係搵咗Terence，本身諗住big day可以再揀吓攝影師，但最後因為見佢影完出嚟好OK，又唔想煩就決定搵埋佢幫手。由於我太太係台灣人，我哋喺台灣擺酒，所以之前喺香港就做簡單嘅註冊儀式。以下我講嘅big day都係指喺香港註冊嗰日，因為我老婆有自己其他諗法，就無再請Terence去台灣幫我哋影。 我哋big day喺伊甸園，Terence佢就幫我準備埋成長片段。同prewedding比，今次我自己責任就大啲，因為我要話俾佢知個場地會係點，等佢可以知道到時佢要點set up啲燈光同器材之類，同埋同佢講當日嘅流程。佢都會同我哋講定嗰日佢大約會點幫我哋影，我哋會去邊啲地方再影相之類。 嗰日我哋大約9點左右開始影，到下午4點幾5點左右。因為嗰時喺場地入面影完，3點要交場，我哋見附近都有啲景可以影吓，就問Terence下午唔介意嘅話不如幫手喺附近影幾張。我哋未夠3點就出去戶外再影，本來諗住都係影多1個鐘左右，之後仲可以返屋企沖個涼換套衫先同屋企人去食飯，點知最後係影到無時間，因為佢幫我哋影咗好多，真係超過我哋expectation！講返big day相就都好standard所以無乜大問題，各方面佢都好配合，無意外發生。snap shot嗰部分佢都捕捉得幾好。不過有啲朋友仔就覺得自己俾人capture咗個樣唔靚，但呢啲都無辨法嘅，咁啱嗰個人個表情係咁嘛。我自己就覺得可以再多啲snap shot，因為啲排排企相都睇到幾悶，會想睇下當時其他人啲表情係點多啲。 其實我哋1月16日註冊，3月就喺台灣擺酒，得個半月左右時間。Terence佢都好快起到晒貨，等我可以攞啲片同相去台灣嗰邊播。我知佢應該係特登幫我趕，因為我試過下午message佢問佢啲嘢，佢大約7點幾再覆，我就知佢應該係忙緊，要等大約入席嗰啲空檔覆我。不過雖然咁急幫我趕，佢做出嚟嘅quality係好好！我用佢輯相去到台灣俾啲人睇完，個個都係勁驚訝！我哋結婚嗰日落大雨佢都 特登出去同我哋影外景，影完出嚟又唔覺得天氣唔好。而台灣啲人影相影到啲人好似啲膠公仔咁勁執相，Terence就幫我哋影到好自然，所以去到台灣個個睇完都讚不絕口！

我太太係台灣人嚟，嗰時我求咗婚之後，好後期先去台灣成功提親，所以返到嚟都唔好多時間先去搵婚紗攝影。我自己去金都都有睇過吓啲唔同舖頭，但嗰時覺得無人介紹就唔係好敢幫襯。之後身邊有朋友幫襯過Terence，口碑都好好，話佢跟啲嘢都跟得好貼，於是我就去搵Terence傾傾。第一次見佢已經覺得佢好親切，唔會話好有架子，佢好多嘢都肯傾，睇下可以點樣互相配合。嗰次我上去傾完就再返去問下老婆意見。我老婆都有搵過幾間，睇完都覺得Terence嘅style都係我哋想要，同埋佢嘅態度好好，2-3日內就confirm咗。 Confirm咗之後有特別約一次去佢studio度傾，佢好清楚同我哋講下當日嘅安排，有啲咩要準備，之前嗰晚要早啲瞓之類。我哋想去咩地方影，佢又提議吓去啲咩地方都喺嗰日傾清楚晒。Prewedding交通嗰方面佢都安排埋，所以我哋都無咩要擔心。至於揀衫方面就好睇個人喜好，主要都係我哋自己搞掂。 攝影當日佢真係好瞓身，用好多專業嘅技術去幫我哋影好嘅相。我哋自己其實之前喺香港搵過第二間影（係啲團購服務嚟），諗住練習吓影婚紗相會點，所以真係好感受到Terence佢嘅專業同態度好好。當日有個小插曲係我好記得嘅，當時我哋去咗西九文化藝術區度等日落影相，所以就有段小小嘅時間休息可以抖抖。因為嗰朝真係好早起身，我嗰時真係攰到瞓著咗，但原來Terence佢無坐低係度抖，而係去咗唔同嘅位置試角度。到啲天色啱，可以影得嘅時候，佢就叫我哋過去影，佢已經試好晒所有嘢埋得位，我都有啲唔好意思！我覺得Terence佢比較完美主義，其實對消費者嚟講係好嘅，但有時都會真係花得多咗少少時間去試角度同位置。我自己個人嚟講就覺得佢好專業，因為啲相出嚟嘅效果真係好好，但我就擔心可能其他人會覺得佢太花時間，未必個個都明白佢嘅用心。如果影出嚟唔啱個客口味，就可能令人誤解咗佢浪費時間，所以或者佢可以喺呢一方面平衡一下。 嗰晚影到10點幾先完，之後大家仲一齊去咗食宵夜。佢當晚竟然已經幫我執咗啲精華出嚟！我其實嗰時已經瞓咗，但我第二朝起身見佢4點幾send咗個message俾我話執咗一啲相。我第二朝起身睇到真係好感動！其實我哋被影係唔知出嚟個效果會係點，到睇到佢send出嚟嘅link，原來佢瞓身喺地下度幫我哋影嗰啲真係好靚。佢真係做突晒俾我哋，真係好感動！其實我無諗過佢咁急咁快出好俾我哋，不過佢都知我哋時間唔夠同埋我心急（我哋10月左右影，1月中已經係big day），所以都好快俾咗啲作品我睇，所以都覺得佢真係好專業。佢喺最忙嘅時候都幫我趕起，又無話要加錢，真係好幫手！唔該晒你Terence！