我一開始係幫襯咗一條龍結婚服務，當時睇好多報導都話一條龍唔好，而我自己都真係好擔心影出嚟效果唔好於是就搵咗Terence影big day。後來嗰間一條龍服公司直頭執咗笠！好在Terence一路安慰我，一路同我講唔使擔心，話晒俾我知要點樣做，都真係感謝佢咁由衷咁體諒我既感受。 嗰時我同我老公成日同佢講「我哋未結過婚乜都唔知點搞架！」，而Terence佢就幫咁多人影過，應該就知多好多啲細節嘢。於是佢就幫我哋睇rundown，remind我哋啲時間點安排之類，真係幫咗我哋好多！ 到big day嗰日，我之前安排咗8點鐘要接新娘，但到8點半個妝都未化完。原本Terence係安排幫我哋影完先落去幫啲兄弟影，但嗰時佢同我講咗句”No worry!”，就落去同啲兄弟影晒要影嘅嘢先再返上嚟。其實因為女家啲親戚比較多，有16 pair人要斟茶，但係遲到9點鐘都未開始斟茶，吉時11點就要去到男家嗰邊，大家都開始擔心斟唔切茶影唔到相！當時，Terence佢就幫我做咗好多additional嘢，例如大妗姐角色嘅係我朋友幫我做既，而其實佢都唔係好識，Terence就幫我同佢講要做啲乜野，斟茶時要講啲乜野，出門時點樣行出去等等都有教我哋。又安排每一pair人飲茶嘅次序，大約時間要幾多佢全部幫我處理好。佢只係同我講，叫我唔好喊，要做個好好嘅新娘子，我真係好感動！最後我哋on time出發去男家，而Terence又安排好晒啲兄弟係樓下要點企，所以影完出門嘅相一落到去已經好順利咁即刻影埋花車相，真係安排得好好。除此之外，佢仲會不時提我哋要幾時換衫，幾時吉時，好清楚安排令我哋好放心！（其實好多時係佢提返我哋添！） 嗰日除咗Terence之外，仲有同2個人拍video。有時Terence忙住幫我哋影就會miss咗啲親友snap shot，不過我有個朋友自發幫我影相都捕捉到啲鏡頭。但其實我見到嗰位朋友有時都可能會阻住Terence，但佢都會俾我朋友影先，唔會令我難做。負責朝拍晚播嗰位攝影師都影得好自然！我下午註冊嗰時要落一條樓梯，佢就同我講定落樓梯時要注意啲咩，會有咩情況可能出現，例如會唔會踩到裙，花球同頭紗要喺咩位置先唔會影響影相同拍片，嗰位攝影師都會教晒我，好impressive。然後因為我哋又唔知佢哋其實幾時影緊，所以結果朝拍晚播條片出嚟效果好好，非常自然！成長片段當然亦都好好啦！ 婚宴嗰晚，我買咗即場派相service，派到8點左右，Terence佢見我親友都幾多，就問我使唔使派埋後面嗰啲時間。我問佢使唔使加錢，佢就即刻直接俾個價錢我，我聽完覺得合理都即刻買埋個service。我哋都覺得佢係好清楚直接，唔會搞到我覺得好煩惱！ 我老公都話覺得Terence佢嘅安排一流，啲片嘅質素都好好，覺得佢好識帶氣氛。因為始終男人影相就比較木納啲，我老公佢就好深印象Terence佢會教啲兄弟點樣企，或者笑多啲，令一啲好木納嘅兄弟都可以搞笑起嚟。好似我老公好怕晒而有成「謎」埋隻眼，Terence會好似氹細路咁氹佢，叫佢睜大眼，好有趣！總括嚟講我哋覺得Terence真係超正，我哋都覺得將來影家庭相都會再搵佢！ 於是我就喺Terence度訂埋相簿，佢本相簿質素真係好好！因為我安全起見喺淘寶度都印咗一本，一對比真係覺得Terence嗰本真係好值呢個價錢，真係一分錢一分貨。

其實當時真係搵咗好耐都真係唔知搵邊間，始終又未結果婚都唔知邊間好。雖然有親戚搵過Terence影家庭相覺得佢影得好靚，但係始終我哋影既係結婚相唔係家庭相，所以都有猶疑過。直至我哋係呢度見到Terence响最受歡迎攝影師個榜到排得咁高位置，又見到其他bride啲comment真係好好我哋就決定搵佢喇。 都想提醒其他bride關於嗰啲一條龍服務真係要諗清楚，因為我一開始幫襯咗嗰間一條龍服務係有包攝影既，但係嗰排啱啱睇到有人用完一條龍既攝影服務試過影完出嚟係無頭無腳、影唔到個新娘喺相入面、地下影到攤水或者係無影到個爸爸。我怕我幫襯嗰個一條龍服務佢影出嚟如果唔得都真係唔知點算，於是就都係決定再搵多個，始終呢啲嘢無得博，唔得就真係唔得架喇！後期點知自己嗰間一條龍都真係執埋，喺婚展度join，咁啱俾埋衫嘅訂金先嚟執，萬幸之中就係都好攞埋prewedding相底佢先執，不過其他嘢就真係無得跟進喇。所以我原本係打電話去問Terence hold 期同confirm big day，後來再上去studio度傾完聽多啲details就又變咗confirm多輯overseas prewedding～！諗返轉頭真係好在搵到Terence，佢聽完我哋既經歷都好同情我哋，佢真係幫咗我哋好多！ 講返prewedding，其實Terence佢完全無hard sell我，係我聽完佢講個plan之後覺得都幾吸引先幫襯埋。我哋傾嗰時佢都直接話俾我知啲嘢幾錢，明買明賣，好清晰！佢有問我想影邊一類型嘅相，我就show咗一啲俾佢睇。因為我哋打算去沖繩影婚紗相，夾夾埋埋都會喺7日(影咗1日半啫)，Terence就教我上淘寶度買婚紗好平，唔好租，因為要租咁多日就不如買一件。於是我就自己去買婚紗，佢就再睇吓係咩色可以點襯。佢同我講完要帶咩頭飾去之後都幫我攞埋後備，然後事先已經傾好晒啲婚紗幾時咩場景著。因為某啲場景著會撞色唔靚，邊件應該著先因為難換衫，佢都話埋俾我聽，非常清楚！甚至連去到邊個景點附近有得換衫，邊個景點咁去會順路啲佢都幫我諗埋，好細緻！ 我哋傾去要咩景點嗰時，其實Terence佢俾咗2種方案我。第一個方案就係如果想影到晒一個景點嘅氣氛就要影耐啲，第二個choice就係去多啲地點，影啲snap shot啱feel就走。我覺得Terence佢真係好好，因為佢無必要一定幫我哋趕咁多個景點，但佢就俾一個option係可以完我嘅心願，好清楚講我有咩要取捨。最後我都係貪心地揀咗第二個方案！另外要提嘅就係好多人都知去沖繩影相要自駕遊，但其實我哋2個都無車牌。Terence佢唔止肯幫我哋衝景點，仲幫我哋諗埋住邊間酒店會好啲，車容易到，去攝影場地又方便。喺沖繩嗰陣佢仲揸車嚟接我哋出去影相！我哋覺得佢真係好好，因為身為一個攝影師佢真係無義務要嚟酒店接我哋出去。 去到沖繩影相，差不多我要嘅地方佢都去晒，影咗成6/7個景點！其實我feel到嗰日佢都幾辛苦，又要攞住晒啲equipment又要自己揸車，仲帶埋個化妝師去咁多地方。雖然個化妝師一開始都要磨合一吓先，但個化妝師喺好多細節都有幫手，會隨時幫我執返個妝，仲幫我手著和服。嗰時我哋想book個教堂景，我哋pair up咗另一對新人一齊去影，因為Terence佢用3日幫2pair人影相，個教堂就我哋2 pair都會去影，大約一人影半日。不過其實我係一日加一個朝早，所以就無見過另一pair人。Terence佢真係好有經驗，好多時都係佢帶住我哋。我自己反而覺得去得太多個景點真係辛苦佢喇！