本身揀左佢哋影bigday，因為我地成日都揸唔定主意影唔影埋prewedding好，最後因為怕太太後悔無影到，所以都係決定結婚前三個月先搵佢哋影埋輯prewedding，時間都真係好倉促。搵Terence時佢一早講好咩時間之前影就會比到相我，最後跟佢時間安排影佢就真係比到相我，有信用好守承諾。 我哋覺得Terence個studio好舒服，本身淨係諗住著便服影studio shot，但係最後都決定好似啲婚紗相咁去影埋外景。我哋總共去咗三個外景，當時有Terence、助手、化妝師一共三個人，因為我同太太對外景都冇任何意見，所以全權交由Terence決定。我覺得山頂果輯影得好靚，可惜就係果到就太多人影，就算好似我哋咁平日去影都有好幾對新人。當中有個小問題而我都有同Terence講過，就係婚紗個cutting唔夠fit，令到有某個景點嗰著嗰套衫嘅相全部用唔到，不過嗰刻我哋全部人都冇人留意到。其實都冇乜所謂，反正其他相都影得好好。 好特別既係當日我book咗UA一間小型戲院，因為我同太太第一次約會就係响戲院，所以就想影得有紀念價值啲，俾我朋友佢哋睇都覺得好特別。包場方面就100蚊位包汽水爆谷，因為我影相唔需要嘢食，所以最後有扣返一筆錢。因為行程關係我哋冇去Terence嗰到集合，而係去咗戲院附近嘅地方化妝先，然後就揸車去戲院。 係戲院影咗兩個鐘，因為租場關係唔可以預先了解場地，好多嘢都係去到先可以安排點影同埋睇燈光點打，其實佢哋成team人都好興奮，好enjoy成個過程，佢同助手即場諗左好多idea，效果好好，真係好多謝佢地。

其實之前做過好多次兄弟，有一次喺朋友婚禮接觸過Terence，發現佢嘅服務態度好好，亦比一般攝影師有禮，我個人比較喜歡呢類，文質彬彬。我哋決定咗Bigday用佢之後，再搵返佢哋影Prewedding。 一開始approach去到影完俾錢，佢都有種好親切嘅感覺，好似一個朋友為你準備婚禮咁。 Bigday當日覺得佢有做足準備工夫，亦發現佢哋隊crew合作得好好，當日每個transition嘅配合度好高，好快可以影好相，走位set嘢亦都好快手。我諗Terence呢隊crew加上呢個價錢係好值，佢有五個人，再加一個夜晚嚟edit片嘅人員，total 6個人，所以人手方面十分充足。 佢有俾返兩條片我哋，一條係slideshow，另一條係花絮，早拍晚播亦有俾到兩條片我。好多朋友都有讚slideshow，話估唔到啲相capture到好多detail位，捕捉咗好多佢地想像唔到嘅畫面。 另外有少少建議比新人，時間要預計得好啲。因為當日時間太tight，結果我哋俾攝影師嘅時間都唔太足夠，影唔到太多雙人照。如果新人希望影多啲相，就要預時間預得鬆動啲。