Big day後嘅第二朝我哋睇咗Terence個早拍晚播，同埋睇咗一啲佢send返俾我哋嘅相，就覺得應該可以有一輯更好嘅婚紗相（之前prewedding有唔好經歷），於是就即刻決定再搵佢影post-wedding！因為Big day嗰時真係好開心，覺得好難得搵到個咁好又夾嘅攝影師，而且襯住自己個身形嗰時仲KEEP到，怕一年後會走樣，就快啲mark埋佢期，係結咗婚嘅2，3個月之後再影多輯。 化妝師同婚紗公司都係big day之後Terence幫我安排晒，係全個組合再嚟一次。Terence佢無話俾我聽其實佢搵返我big day個化妝師。影Post-wedding之前個briefing，Terence就同我哋講「我知道你好擔心化妝呢一part嘅，咁我為咗令你開心，我已經安排好咗喇！」。嗰時我哋仲笑住咁問咩事呢，原來佢偷偷地聯絡咗我big day 個化妝師幫我喺post-wedding度再化。嗰個化妝師係我非常推介嘅一位化妝師嚟！我影完big day 同post-wedding之後都係咁同我啲朋友推介呢個化妝師。 今次再出去影相感覺好似去玩咁，因為同Terence、化妝師都已經熟咗，變咗好似一個大家嘅gathering咁！而且Terence佢真係一個好仔細嘅人，嗰日嘅嘢佢都安排得好好又無甩漏。嗰日真係玩得好開心，同埋影出嚟係我地想要嘅嘢，佢知道我地想影到人多過景，去到某啲地點或角度都會同我地講「呢張相可能個景會大少少個人細少少㗎吓」，好體諒我地之前嘅情況。嗰日我哋去咗山頂、中上環同西九，夜晚就返中環影夜境，都係Terence同我哋商量完嘅行程。我哋都覺得佢攞景同角度都好快同好純熟，而去到每個景點我哋要企邊度同擺咩pose佢都好清楚咁指導我哋。因為我哋兩個都唔係好知點擺pose，真係全靠佢指導。特別係經過big day之後，我哋好深咁體會過佢叫我哋擺嘅pose原來會影到好好嘅效果，真係覺得神乎其技。 雖然我哋攞到晒啲相但就仲未揀到放邊幾張做album，因為覺得張張都好靚，都唔知點揀好！其中一張我哋特別有印象嘅相係喺山頂度影。嗰日我哋喺山頂真係好大霧，一個人嘅身位已經會蒙咗。我哋喺嗰度影嘅相真係好有仙境感覺，好似去咗Harry Potter學校出面咁！後來我見Terence都有POST嗰張單人婚紗相出嚟，影得好靚！

本身我哋係搵另一位攝影師幫我哋影prewedding同big day，一次過confirm晒。不過影完prewedding後我哋覺得影出嚟唔係我哋想要嘅嘢，而個攝影師嘅服務態度都令我哋覺得唔係好滿意。原本我哋都因為俾晒錢打算忍吓，但係由prewedding後到big day前傾rundown嘅成個過程都溝通得唔係好開心，所以直到差不多我哋big day前一個月多啲我哋就下定決心要換攝影師。因為big day都係一生人一次，都唔想嗰日影得唔開心。好在，我哋租婚紗嗰間店(Butterly)嘅老闆佢好好人，聽完我哋嘅故事後就介紹咗2個攝影師俾我哋，其中一個就係Terence (TcTang)。老闆介紹Terence係一個好有經驗嘅攝影師，令到啲客人好放心。之後佢都有叫我自己上facebook睇吓兩位攝影師啲作品再作決定。我哋睇完之後就揀咗Terence，因為覺得佢比較有經驗。 我哋未見Terence前同佢講咗一次電話，喺嗰次電話中都大約傾咗rundown嘅七八成。一開始我哋都覺得唔好意思，要咁急問Terence佢攞個期。不過Terence都好好人，佢聽完我哋之前嘅故事又見我哋咁急，就叫我哋第二日上佢個studio度傾吓點影big day。其實同佢傾完個電話之後，我哋已經九成諗住confirm佢。我哋嘅big day係12月，到我哋confirm Terence嗰時已經差不多係10月尾。我哋都覺得Terrence佢好肯聽我哋講嘢，又肯聽我哋意見，唔會係咁sell自己幾勁之類。不論係講電話定上去同佢傾，佢都俾過好多好嘅意見我哋。因為佢幫人影過好多Wedding，都經歷過好多，好多可能係我哋理想化咗嘅嘢未必可以咁smooth運作到佢都有俾意見提醒我哋。例如，傾到big day當日中間我想出去影相，佢都會提我哋要諗某啲地點嘅人流同時間會大約係咩情況之類，都係好實在嘅意見。我哋同佢講我哋會喺尖沙咀皇家太平洋度出門同擺酒，佢即刻好快就搵到一張喺嗰度影嘅reference相俾我哋睇，但唔係exactly同一個方向。於是，轉頭佢就再攞相出嚟，然後同我講到時佢喺間房入面大約邊度會set機，會係咩角度同方向，同埋會大約影到啲咩。連我出門嗰時應該係邊個位攔花球，佢都講晒俾我知，所有嘢都同我哋溝通得好好同好仔細。 到Big day當日，因為斟茶我哋無請大妗姐，啲姊妹口才又唔係好好，所以嗰時完全係靠Terence喺度帶住。不論係喺旁邊講好說話，定邊個飲茶嗰啲，全部都喺靠佢！由於佢講說話好得人歡喜，令到啲媽媽們都好開心！到咗中間去外影嘅時間，佢轉地點影之前又會問下我哋「我哋嚟緊會去呢度影喎，有無問題呀？」或者係時間多咗，又會主動提議我哋喺酒店影多幾張先。Terence最令我印象深刻嘅，就係佢幾次見到我個樣有啲奇怪，就問我「你係唔係唔舒服呀？如果係嘅話可以抖抖先喎，你個樣都有啲攰喇！」。其實我嗰日真係好攰，因為我哋吉時好早，9點前就要出到門，真係好早已經要完成晒所有嘢又好早起身，所以我到下午已經好攰無乜表情。我覺得Terence嗰日真係比任何一個姊妹更加關心我當刻嘅感受，我好開心嗰日全程有佢睇住我。（當然我老公都關心我啦，但佢都好忙嘛！）至於我老公，佢原本都好擔心big day當日嘅各樣嘢順唔順利，但因為有Terence喺度幫我哋睇住，令到我老公都覺得成個big day係好開心，好完滿。成日個rundown同schedule入面，佢可以講得上係比任何一個兄弟姊妹更加幫到手。最後，因為Terence佢話怕嗰日現金交收大家都唔方便，要睇住舊錢，所以我哋事先溝通咗喺第二日先過埋尾數。 我哋真係好開心有Terence喺我哋嘅big day當中幫手，big day嗰日大家都玩得好開心。佢為咗我哋又無乜食飯，寧願幫我哋影多啲相都無乜食嘢。所以，我哋都覺得Terence佢要好好照顧自己嘅身體先得！真係要好好照顧自己呀Terence！多謝你！