我想擺晏晝西式自助餐，所以想搵個環境好啲嘅場地，於是就去睇淺水灣酒店同深灣遊艇會。比較過覺得深灣遊艇會minimum charge，配套同位置都比較好，而且而家有地鐵去到，好方便，所以就揀咗呢度。 呢個場嘅環境真係好靚，出走廊度望到成個遊艇會。佢哋有兩個hall，一個hall用嚟證婚，一個hall用嚟擺午宴，我就擺咗20圍，hall內嘅燈光效果真係唔錯。佢個環境同花品佈置都好靚，我都唔洗再加其他嘢。 佢哋服務真係好到不得了，好到嚇親我，連我奶奶都係咁讚。佢話serve佢哋嗰檯嘅侍應同佢講：「auntie你要依啲咩，我幫你拎！」因為見到奶奶著住長裙唔方便行出行入，佢幫手夾好多唔同嘢食，又問佢食唔食蛋糕，夾俾佢，服務好主動！除咗賓客覺得service好，連我自己都覺得佢哋啲服務真係好到不得了，全程除咗當席經理，仲會有一個經理同一個妹妹跟住我，我每一次影相都幫我擺條裙，而佢哋見我喺台上影相影到有啲攰，會好細心拎嘢俾我飲。我喺新娘房補緊妝，佢哋又會主動拎嘢俾我食，又俾飲筒我飲嘢，真係要讚下佢哋團隊！！Sales Sarah，場地經理James，同埋新娘助理Sanko，佢哋真係好好！ 我因為擺晏晝，朝早六七點已經出發，三點鐘完咗婚禮，中間冇外影，佢哋好好，俾我完咗婚禮出去碼頭外影，係一個好好嘅經驗，因為環境真係好靚。當晚佢哋有另一場婚禮，新娘房我唔可以再用，佢哋就搵間房俾我換衫等等，新娘助理Sanko同另一個assistant又喺外期間幫我擔遮，因為好曬，仲照顧埋啲姊妹。佢哋真係serve得好好，照顧得好周到，冇得彈。 佢哋嘅食物又真係好標緻，只係種類少啲，如果佢哋嘅食物款式可以多啲選擇就更加好，因為好多食物都要加錢。但係所有賓客收返嚟啲feedback係好好，個個都話啲食物好正！