為咗就住個location搵場地，我哋嗰時主要係諗朗廷或美麗華Mira。我哋去咗朗廷酒店open day，佢哋無逼我哋即刻落訂，於是我哋就再去睇咗幾間。最後我哋覺得朗廷個場地四四方方無柱位，感覺適合同埋價錢合理，就喺酒店promotion 完之前返去confirm。 幫我哋個manager -Angel好好，佢好nice同好專業。佢俾嘅advice好好，聽完我哋嘅request又會好樂意幫我哋跟進，籌備期間樣樣嘢佢都跟得好足，而且一直同我哋keep contact，唔會無咗影。不過剛剛我哋結婚嗰時佢就同我哋講佢會轉行，真係有點可惜。 場地方面整體都OK，backdrop就我哋自己搵人做。影音方面無乜甩漏，只係上菜嗰度慢少少，感覺好似拖長咗時間，不過客人都話啲嘢食幾好。新娘房各樣嘢都好乾淨整齊，唯一係佢送嗰2晚酒店房用嚟做婚禮嘅嘢就有啲細。嗰2間房大約五百幾尺左右，一房一廁所一廳，如果有八百幾九百尺就會易處理好多，不過我哋諗住酒店package包得都係差不多大間房，所以都無同manager傾過會唔會有其他選擇之類。至於Parking方面我覺得佢哋處理得好好，有代客泊車，又包20架賓客車位。我結婚嗰2日出出入入酒店好多次，嗰個代客泊車小弟都好落力幫我，又無話俾面色我睇，感覺好好。 成個婚宴服務最令我印象深刻嘅，係臨尾我哋兄弟姊妹、攝影師Johnathan同一啲朋友個個都好開心唔願走。大家見反正訂咗好多紅酒，就喺一入酒店reception 右手邊啲梳化area度飲酒傾計。我本來都係諗住飲多半個鐘左右，但最後飲飲吓竟然玩到1點幾2點！當時嘅Captain不單無趕我哋，仲願意serve我哋，幫我哋開埋酒仲預備酒杯。佢又同我哋講唔緊要，慢慢飲，嗰晚好似after party咁，真係好開心！真係估唔到咁好，我仲封咗一大封利是俾serve我哋嘅Captain Esther。

本身同老公諗住搵九龍區嘅酒店，搵咗好多間，始終價錢適中之餘又有一定質素嘅選擇其實唔多，而且好多酒店提供嘅場地又唔夠大（我地擺三十圍），搵朗廷之前都有諗過將軍澳Crowne Plaza，不過就太遠，Sheraton個場又唔夠大擺三十圍，所以都諗咗好耐。本身㨂定咗日航仲落咗$3,000訂，之後聽人講長輩唔太喜歡扇形嘅場地，所以惟有再搵其他酒店。不過好好彩嘅係因為退訂嗰陣正值係日航轉名做“千禧新世界酒店”嘅時候，佢哋有個政策係俾客人考慮轉名之後仲會唔會保留訂單，所以我就幸運地可以退到錢！其實以九龍區嚟講，朗廷既性價比都算幾高，始終尖沙咀嘅酒店閒閒哋都要萬幾蚊一圍，而且佢哋個地段唔係差，北京道都算好方便，於是就confirm咗。 因為我之前唔喺香港做嘢，睇場方面就交俾我老公。佢影咗朗廷嘅相俾我睇，我覺得都幾靚，四四方方夠大，唯一擔心嘅係個場有四條柱，驚會阻住其他人嘅視線。後尾我返到香港自己都有親身落場睇，就發現個場真係幾唔錯，四條柱都只係遮少少，又有位擺cocktail同其他嘢，如果樓底可以高少少就perfect。 跟我哋嗰位Sales 同事叫Margret， 佢真係好好，除咗由頭跟到尾之外，好多我唔要嘅嘢佢都會搵返alternative俾我，例如我唔需要reception嘅佈置同酒席嘅台花等等，佢哋就補咗個candy corner俾我。另外，當晚嗰位captain服務亦好好，因為我有張好大嘅掛畫，開頭唔清楚個場地夠唔夠位掛同埋有無架可以掛出嚟，但佢就幫我搵到個有個勾既架，同埋好好咁掛咗係ball room門口嘅正中間，個個都見到，解決咗我呢都一度好煩惱既問題，呢點要多謝佢！而且，負責跟住新娘嘅女仔真係做得好足，上台會幫我拉裙，又係我換衫換妝嘅時候拎嘢食俾我，就連我伴娘都讚佢做得好足！不過，如果朗廷方面可以再早少少俾場我就會好啲，雖然嗰日咁啱冇event，可以早少少大概四點幾交場俾我，但我回想都覺得時間有啲緊，始終自己有好多嘢要佈置。 嘢食方面，我聽賓客講入席前嘅cocktail serve得好好，侍應不時會問駛唔駛添飲。朋友嘅feedback話嘢食幾好。晚宴完咗雖然Room Service都有pack 返啲嘢食俾我哋，但因為佢冇幫我整熱，啲嘢食凍咗食落去感覺就唔太好。不過要讚既係，佢哋美點雙輝嘅老婆餅真係好好味！本身傾酒席嗰陣已經同我講好多人都激讚呢個老婆餅，仲話想買都買唔到，因為只可以喺擺酒先食到呢個人人盛讚嘅老婆餅，試完個感覺果然係名不虛傳！