Lemongrass佢地有好多設計好嘅花球款可以揀，我自己就揀左札細細地有黃色同白色既花球，同埋包左2個襟花加頭花。估唔到除咗我買嘅嘢，佢地仲留起咗用淨既花材比我著褂個時當頭飾用。我最滿意嘅哋方係佢地Ｄ花包得好穩陣，又用個盒裝住俾我哋，仲會額外比支營養水我地用。收到枝營養水又唔使怕唔識用，佢哋會send晒video教我地點樣養住Ｄ花，指示好清楚，所以花球用完後仲可以擺到幾日。Overall又覆得快，所以感覺不錯，可以平Ｄ嘅話當然就更好啦！

對於Lemongrass我唔算太滿意，因為佢哋價錢都算貴，但出到黎花球嘅配色同我想要嘅有出入。花呢啲我哋唔係好識，所以傾嘅時候都係上網見到咩圖就佢哋講我想要類似呢個樣，但最後花球整出嚟嘅顏色都唔似我鐘意嘅feel，拼色唔係我心水想要嗰啲，因為佢哋話我結婚嘅季節係冇嗰啲色。其實嗰時好忙，我都係婚禮前一日先攞花球，所以就算覺得啲配色唔係好啱，都冇咩特別challenge佢。佢哋嗰邊一直好想我可以親自去攞花球，但最後我實在安排唔到時間，佢哋就幫我call車運花球過嚟，到我呢邊再比錢。我收到個實物嗰時真係有少少唔開心，唔係自己心目中100%好想要嘅嘢，不過又未到覺得要俾返佢哋再造過咁差嘅，所以都無再同佢講翻顏色嘅問題。花嘅鮮度okay，係去到七、八點左右就爛爛地同啲葉皺皺地，不過都可能係我影相嘅時候拎得唔好，未必關佢哋事。