其實個package包咗攝影租衫同姊妹化裝，可以話係唔洗錢，但係我唔知點解佢哋會求其派兩個人過嚟化妝，我以為係一個資深化妝師嚟，點知嚟咗嗰兩個人係o靚妹。 我一開始講到明唔會用佢哋嘅化妝師，因為個化妝本身係包新娘化妝，因為我轉咗要化四個姊妹，兩個媽媽，變咗佢total要化六個人，可能佢減輕成本啦，六個人呢個價錢都合理嘅。速度方面化得好快，但係就快到化出嚟係樣衰。Set完頭你會問，吓你咁就set完架嗱？ 我有同佢講個妝好似爭啲，不過再講落去都冇意思，因為佢都做唔到個效果出嚟，點講都係哂大家時間。其實佢哋有嘗試照我要求去改，不過唔成功。最後有啲姊妹直頭卸咗妝，寧願素顏。 還衫嘅時間冇見到老闆娘，如果我返去拎相嘅時候見到佢都會同佢反映下，雖然要化六個人啫，都唔好咁過份。佢都冇提過會係呢啲質素，我以為佢會俾專業化妝師俾我。 成個package包咗攝影租衫同姊妹化裝，大概$28,500。

我好鍾意佢哋嘅衫，我試衫嘅時候啲姐姐都幫我整瘦啲令我著起嚟好睇啲。佢哋都有提點我應該著咩衫會好睇啲。幫我試衫嘅女仔就冇講任何嘢嘅，都唔會俾任何評語，但老闆娘就好中肯。因為我第一次試衫嘅時候係未減肥，鍾意啲款式就完全著唔到，碌都碌唔到上去，老闆娘就話：「我俾多幾個月時間你啦，你幾個月之後再嚟試，減完肥就一定著得落架喇。」跟住減完肥我真係著得落嗰條裙，因為我真係好鍾意嗰條裙，一定要著得落為止。 佢哋女仔衫嘅款式真係好多，係無論你咩身型佢都會幫你改，我鍾意邊一個款都好，無論我幾肥或者幾瘦佢都改到俾我。整體嚟講啲衫都新淨。 不過男士禮服唔係好得。我老公大概1.8米高，比較大份，啲衫係少到冇得揀，得一到兩款。佢冇夾硬強迫我老公要佢哋個款，如果我哋揀得啱心水就可以額外加多$800幾蚊就租一套full set男禮服俾我老公。因為我老公自己出面都有訂咗一套禮服，佢就想多啲造型就同In wedding租咗套紅色西裝，成件事都ok。 成個package包咗攝影租衫同姊妹化裝，大概$28,500。