呢間舖頭係尖沙嘴百利商場，個日我地咁啱係個度行下，見到佢都幾大間，佢個門口擺咗啲晚裝，我就睇咗幾件，本身都驚比人sell，但個老闆就同我講話唔啱唔緊要，最緊要係自己啱款，唔係chur我地既，我又咁啱見到一款好鍾意，紅色low cut魚尾，佢都有比我試，我之後都有睇埋其他，我見佢地同其他店舖價錢都差不多，而且又有我鍾意既款，所以就揀咗佢地！ 我連裙褂都係佢地個度租，都係新淨既。我全部衫都係個度租，覺得咁樣方便啲，可以一次過拎。我覺得佢婚紗款式選擇都多，同埋都有耐性，我個陣都試咗十幾件，又比我影相，最後先揀。佢地啲衫既質素都幾好，啲衫既料都好，因為都幾重，而且白淨，唔會好黃，佢同我講話佢地啲婚紗洗咗一兩次就唔要，因為驚黃。 不過，其他店員就唔算好友善，唔知係咪佢地忙，個陣我帶我嬤嬤去試衫，你知老人家就唔係好想比人幫手試衫，咁老人家就好直既，就話唔洗你幫啊，其實我嬤嬤都唔係有心既，都係想自己黎，當時我就見到個姐姐個樣有啲不屑，咁我又覺得你唔應該比我見到咁既樣，而且佢地都有啲唔耐煩，會話：得架啦你著咩都靚！我會覺得個件其實未必咁好睇，但佢就好似怕煩咁。不過個老細態度就好好多既！

我婚紗同晚裝係分開兩間舖頭租嘅，而我係喺Charming Image租婚紗。嗰時我朋友同我講Charming Image租衫好抵，所以我就去咗睇睇。咁嗰度真係好抵嘅，有package係8套衫先係六千幾。不過佢啲晚裝多款得嚟真係感覺好leung，我真係揀唔落手，所以我只係Join咗$3998嘅package，D晚裝就轉咗做媽媽衫同嫲嫲衫，而最後我哋加咗啲嘢就$5000埋單。 其實原本我都唔太想喺嗰度租婚紗，但sales把口真係好犀利，我喺嗰度3個鐘都走唔到。原本我打算再諗諗先，佢就係咁說我話宜家訂先抵。我嗰時都已經著住袍打算換返衫，佢就叫我再試多次諗真啲。不過其實陪我試衫啲朋友都覺得嗰套婚紗好靚，係好強烈嘅攻勢之下我就訂咗。雖然咁講，套婚紗我都覺得好靚、好特別，有南瓜車lace嘅大拖尾，而且仲要係新貨。而原本我媽話唔租衫，唔想我使錢，但最後我叫佢嘅朋友幫吓眼睇吓啦，就揀咗件要加錢，不過其實呢度嘅媽媽衫都好多款可以揀，唔錯！