我見佢哋d相個感覺好natural同好開心，又唔會好似其他公司咁好一式一樣，手法比較自然同真情流露，所以搵咗佢哋。 我跟咗佢哋一個團去京都影櫻花，出發前我哋都有上過佢哋studio，佢哋會問我哋鐘意D咩，想影D咩景。我老公好鐘意影逆光，佢哋就會安排我哋太陽落山之前某個地方度影到呢個效果，而且影出嚟真係靚嘅！ 我覺得佢哋都好熟悉當地嘅天氣、花期，又知道咩時間去咩地方可以避開D遊客同當地人。幫我哋影相個係個女攝影師攝，叫Denice，我覺得佢影相影得好拼命，就算石地佢都會照趴喺度幫我哋影相唔怕痛，真係加曬分！而且佢哋唔會不停叫我哋笑，笑到個人硬咗嗰種，而係會講D嘢令我哋笑得自然D咁影相。例如，影相嗰陣會叫我老公諗下第時會負責咩家務咁，真係幾好笑！ 唯一覺得可以改善係希望交相可以快少少，因為我四月影咗，到咗十二月結婚前先攞到相。本身應該八月揀完相佢執下之後就會俾到相我嘅，不過揀照個陣我有時又拖咗佢幾個星期，佢又可能拖返我少少時間，最後就遲咗。其實過程當中佢哋一直有個女同事keep住幫我追相，所以都冇擔心過會拎唔切相嘅。