一開頭我有去過幾個都有提供香水吧嘅舖頭，都有幾個選擇，但我就覺得Parisine嘅香水好香，而且好持久，而價格都可以接受，所以我就㨂咗Parisine。😃

整個過程我主要同Maxine同Alvin溝通，佢哋回覆都好快，感覺好有禮貌又好Nice，佢解釋嘅時候到底可以㨂乜款，同埋價錢嘅內容都解釋得好清晰，佢哋會係Big Day當日帶曬所有嘢一齊過嚟，朋友見到香水吧，都話感覺好靚，而且都好玩👍，大家覺得香水都好香，而且都可以㨂自己鍾意嘅味道。

因為我當日都好忙，所以就無乜參與香水吧嘅環節，但聽到朋友嘅回饋都係好正面，係一開頭我會㨂幾款我自己鍾意嘅味，預訂咗100-200支，如果朋友當日拎唔曬，佢剩番嘅香水佢都會整成我鍾意嘅香水味道俾番我，整體我都好滿意佢哋表現。🥰

疫情嘅緣故我哋推遲咗婚禮，第一次搵Parisine嘅時候已經係兩年前。當時有香水吧嘅回禮公司真係唔多，我印象中淨係喺婚展見到兩間。咁我同Parisine職員講試吓當我係婚禮嘅賓客，問佢哋會點樣呈現返調製香水或者成個過程俾我睇。從介紹講解我都覺得佢哋係比較專業嘅，尤其係香水師佢對前中後調嘅解釋都非常之清晰，可以營造到一個好grand嘅感覺。我就比佢吸引咗，而且見金額都唔係好大，費事拖拖拉拉，於是乎一次過就俾咗錢。成個過程入邊佢哋都唔會逼你決定，只係盡嘅責任介紹返package。

🤔 後來遇上疫情，正常情況改期要加錢，但係佢哋好體諒新人都會幫我哋wave咗。package額外送兩支香水，上到去佢哋舖頭，同事一如既往地好熱情，會介紹受歡迎嘅combination俾我哋。如果當日有賓客揀中預先調配嘅combination，就唔需要再溝來溝去，成個過程都順暢啲。😚不過如果佢哋喺人數同埋香水車嘅安排上可以有多少少彈性就好，以我所知佢哋無論係買幾多支香水都好，都係派同相同人手同車。當賓客數量越多就未必可以應付場面，一嚟辛苦同事，二來賓客見到咁長龍都未必想排隊。不過我request加多1個人幫手，佢哋公司都配合到。

🥰香水除咗味道上可以客製化，連樽身、絲帶都可以，絲帶顏色嘅選擇有好多，就連字體都可以選擇。我哋當初仲有考慮過用英文名定係聖經經文，只要唔係太長都ok，同事好快就整到一啲絲帶嘅sample俾我哋睇。🙈 Service hour係四個鐘，唔計set場由4：45開始運作，大概到8：15完。如果8:15仲有賓客會盡量完成埋剩低嘅事情先。不過我後來聽賓客反映佢哋8點幾都繼續做緊，冇收攤嘅打算，可能係見到賓客好熱情，所以好主動ot，甚至都冇專登喺我哋面前提起，可以感受到佢哋對工作嘅熱誠。

😎姊妹係最先體驗香水bar服務嘅人，佢哋都大讚話同事好友善，相處得好愉快。最後剩返大概13支左右，同我預計嘅數量都差唔多，嗰13支香水係可以調配返我當初揀嘅香水味。

😉 總括而言，我覺得如果你哋係想搵啲特別少少嘅回禮禮物，Parisine絕對係一個好好嘅選擇。我自己就唔鍾意人哋用過嘅橋，所以茶包、曲奇、甜品、印自己個樣上去嘅product都比我ban晒。佢哋特別之餘仲好細心，產品同服務方面都比到好專業同好Grand嘅感覺我，真係值得一讚。💯