一開始係上網搵到Novotel Century，同同事Tammy溝通嘅時候，都覺得佢哋幾nice，而且會主動解答我哋嘅問題。每次有咩疑問，佢哋都會好快就覆，有時仲會主動俾啲建議我哋，例如喺晚宴嘅菜單上，我哋需要轉一轉當中嘅餸，Tammy都好樂意俾建議我哋，介紹返唔同嘅選擇，非常貼心❤️。喺 Big Day 當日，Novotel Century團隊整體表現都唔錯，我哋都可以放手俾佢哋處理，唔洗我哋擔心。即使有少數同事偶爾有唔小心嘅地方，例如會撞到賓客，撞跌 MC 嘅相機，但大致上都ok😆。 場地方面，酒店嘅環境幾靚，光線都充足，而新娘房都好大。不過因為舞台嘅地板冇包好，我哋最後決定自己買材料鋪地板，酒店嗰邊唔俾我哋用膠紙固定，所以地板塊布有陣時會反起🥹。我哋就自己安排兄弟姊妹幫手痴住，但如果酒店可以喺呢方面再多啲support，會更加理想🙏🏻。另外，場地中間有兩條柱，有啲位置會睇唔到個台，台上面嘅鏡頭亦都只係得一個角度。不過Novotel Century嘅大屏幕set得好好，賓客都可以睇到我哋喺台上嘅畫面。

大家對Novotel Century嘅食物評價都幾高，大家都有讚，除咗伊麵有啲一般。整體食物質素幾高，賓客都食得開心✨。音響設備同畫面嘅清晰度都唔錯，只係因為我揀咗比較暗嘅天花背景，所以會影響到啲光線，如果酒店可以俾更多聚光燈，會令成個效果更理想🤣。酒店仲俾咗一間套房俾我哋，如果可以額外俾多一間房俾女家父母或者姊妹會更方便💖。因為當日人比較多，會有少少逼。後尾我哋自己額外 book 咗幾間房，酒店方面就無俾discount我哋，反而喺第三方平台會有優惠，所以都想酒店會俾到discount新人👍。當時同事話會留間房俾我哋，但係錢就未俾得住，當中我哋都有少少擔心，因為始終未俾錢酒店🥹。當然Novotel Century團隊喺安排上都好用心，尤其係喺車位問題上幫咗我哋好多，佢哋主動包咗朝早出門用嘅兩個車位，呢點非常貼心，亦好多謝佢哋嘅配合😚。至於安排房間方面，酒店嘅同事都盡量幫我哋安排同一層，咁就會方便啲，呢方面我非常欣賞。不過好多嘢都要我哋主動去問酒店會唔會offer到俾我哋🥹，同埋俾房我哋嘅時間遲咗少少，雖然明白旺季可能會比較忙，但始終新人當日都希望有足夠時間去做唔同嘅嘢🤪。 

Novotel Century嘅地理位置幾方便，所以就揀咗佢哋😆。因為我哋都唔係好清楚啲流程，Novotel Century嘅同事唔單止解答我哋嘅問題，仲根據經驗俾咗好多實用嘅建議俾我哋參考，而且佢哋會就住我哋嘅rundown，去決定當日嘅人手安排😚。

嘢食方面，Novotel Century都可以俾我哋改下個menu，同事都會幫我問吓廚師嗰邊可唔可以做到，會就住我哋嘅要求去配合返🌟，我哋後尾聽返，大家都話啲嘢食好食✨。Big Day當日，負責照顧我嘅同事非常細心咁照顧我。例如當我杯水擺耐咗，凍咗，佢就幫我換咗杯暖水，仲主動俾埋飲管我，真係好貼心💖。敬茶儀式時，同事都會幫手，見到有幾多個人就準備返相應數量嘅凳。敬酒嘅時候我哋以為係順着枱number去敬酒，原來係要跟住一個特定嘅方向，例如係逆時針嘅方向去敬酒，呢啲細節佢哋都有提醒我哋💯。

我覺得Novotel Century可以安排一個同事係做一個類似「總」統籌嘅角色，除咗係負責宴會廳入面嘅服務之外，都可以喺其他地方幫一幫手，例如係親戚入車同落客嘅時候👍。因為佢哋始終係酒店，會分唔同嘅部門，如果有一個大啲嘅角色，整合返唔同嘅部門嘅服務咁就會好啲🥳，如果有時我哋想要一啲幫助嘅時候，都可以安排得快啲🙏🏻。

其次就係車位安排，因為酒店嘅車位比較少，得一個車位俾我哋泊車。其實同事都有話俾我哋聽附近有邊到可以泊車，但係就需要自己去問。如果可以同周邊大廈或其他地方協調，提供更多泊車位或者一啲聯乘優惠，或者我講低需要幾多個車位，同事幫我哋安排埋就更加好，就住係揸車嚟嘅親戚朋友，會更加方便👍。