其實我行咗兩次婚紗展，响嗰日問咗好多地方，咁我就係同我媽咪一起去既幫我傾package，嗰Sales Karen都好好服務，真係佢能力範圍內俾得到既都會盡量俾我地。咁我地攞咗啲資料隔咗一晚考慮完，第二日先返去confirm。 係Regal擺因為方便，其實都有諗其他地方例如陽明山莊，亦有睇過Cyberport既姬子皇朝。睇姬子皇朝因為我教會係半山，有諗過近教會如果有乜嘢急事要返去攞都算近。另外既concern就係個婚期，因為到我confirm到個日期既時候好多地方都已經俾人book咗，就唯有係Regal個場仲有位，而其他地方就怕budget所以就住預算，日期，同埋地點方便就揀咗Regal無再揀其他地方。 我結婚之前幫人做姐妹好多次都見有啲酒店會提供個助手俾個新娘，到嗰日全程跟住佢。我都有問Karen，但佢話佢地酒店無offer既。咁好啦預咗無，但當日其實在場個經理都好醒目，例如見到妳要斟茶都會好主動咁幫妳搬好地方，擺好凳俾妳斟茶。 當日都發生咗件小插曲既，即係我婚宴之前都有問定Karen斟茶嗰啲茶杯茶壺酒店有冇提供，佢話其實要既時候打落去room service佢地就會攞嚟。好啦，當日朝早要出門準備好晒啲嘢，就打落去room service攞啦，但係聽電話嗰個人話套茶杯同茶壺唔响佢地到既，係放响餐廳到既，而餐廳既同事係要10點先至返。咁我就同佢講話唔可能等到10點因為出門趕唔切。Anyway啦，佢地最後都manage及時攞到套茶杯茶壺俾我，問題其實不大，不過有啲驚。都可能係我既問題，應該早一日問定攞定套杯，咁所以提吓各位要預先準備唔好留到last minute先攞。 食物okay，場地okay，揀佢地真係因為價錢OK，地點夠方便。