喺婚展行嗰陣，見到Jason嘅攤位佈置得好grand同古典，加上擺咗張喺大舞臺幫其他新人影嘅signature photo，咁啱我就係喺大舞臺擺酒，張相又影得好靚，所以就被Jason吸引，即時confirm。 Bigday前我哋有開會講返當日有咩環節，同埋講返我嘅要求，因為我真係好想佢哋幫我影返喺婚展見到嗰張大舞臺相！嗰日佢特登叫咗兄弟姊妹排好隊，再加埋水晶燈同花炮，好有心機幫我影，最尾張相嘅效果亦好靚，好鐘意！！ 當日佢十分準時，而且大家真係溝通得好開心。我以前做姊妹見過有啲攝影師好cool同態度好差，但係Jason同佢班crew絕對就唔係咁。例如因為我有買咗好多佈置，佢哋個個一見到就湧埋去係咁影，好自動自覺而且當中仲一齊玩一齊笑，真係好開心。另外我先生就好鐘意Jason夠高，佢應該有成六呎，而因為我哋兩個都唔瘦，我老公就覺得一個夠高嘅攝影師應該可以影到人靚啲，所以firm咗Jason之後佢就好開心話搵到個夠晒高既攝影師！ 本身講明工作時間係八點半到大概十點，我六點半就要開始影，早咗嘅兩個鐘一早講明咗加錢。但最尾擺酒擺到夜晚十一點幾，理論上影完group photo攝影師嘅工作應該到咗尾聲，但估唔到Jason佢哋竟然keep住幫我哋影相，即係我同老公因為顧住要招呼賓客而後期無留意到Jason，但原來佢一路都仲係到幫我哋影，影到真係好夜好夜而最後亦冇提到話要加錢，所以好滿意佢同班crew。 我有姊妹自己走去提Jason話我好鍾意keep相，總之就係乜嘢相都想keep住，咁佢真係好好，最後end up竟然有7000幾張相俾我！我真係擔心會影壞佢部相機。而且package淨係講明包當晚所有相同埋經剪輯嘅video，但我問佢拎未edit嘅片佢都肯俾我。睇返啲相好開心，我都whatsapp同佢講話一定會介紹朋友去幫襯！ 我覺得攝影師最緊要喺敬業樂業，如果攝影師唔係抱住呢個態度去工作嘅話，就只會按單執藥完成份內事，而唔會好似今次Jason咁肯留耐啲幫我影多咁多咁靚嘅相，俾到客人最滿意嘅服務。