我做舊同學姊妹嗰陣見到Anki嘅表現好好，妝容造型唔普通，好有自己style，亦好配合客人需要，於是搭路搵咗Anki Makeup。雖然有睇其他公司，但第一次試妝係Anki，已經覺得佢好nice同埋化得好好，加上我唔揀擇，所以好快就決定咗，試完妝即刻落訂可以免除試妝費。一開始俾左三千蚊訂，其他姊妹、奶奶係後加，大概係bigday前一個月內同佢講要加多幾多個人（最後加咗三千）。 Bigday前Anki有提我㨂好婚紗要比佢睇下，等佢可以諗下造型，所以中間都有whatsapp來往，而且佢好細心，有提我地之前唔好用護髮素，廢事set唔起頭。 嗰日加埋佢自己有三個人，而我計埋伴娘有六個人，所以佢哋大概一個serve兩個，而我媽咪同奶奶就由佢親自做返。佢哋嘅態度都十分nice同埋會聆聽客人想點。 下午我行教堂，佢想我試下一個allback嘅造型，不過佢都會問我先，睇我想唔想試下呢個突破啲嘅髮型。雖然佢認為無論突破定簡約都好靚，但因為我自己鐘意簡約嘅造型，所以佢最尾有幫我set返個簡約而又靚嘅髮型。呢件事睇得出佢係會揀一個啱我嘅頭，而唔會逼我選擇某啲造型。 另外，因為我哋去到酒店先補妝，所以後尾減少左一個人，不過我就覺得人手都好足夠。Anki好快手，冇任何overrun，加上因為我夜晚冇乜轉衫，所以唔洗嘥時間係轉妝上面，令我有多啲時間同返客人傾計，亦令自己同化妝師都唔洗係壓力下rush轉造型，仲可以講下笑食野，好free。 而且佢嘅造型唔會悶，有啲化妝師太有經驗，容易令造型照辦煮碗，迎合潮流，但Anki係會自己創作，盡量創新，每次都有新嘅野，呢樣係我最欣賞嘅。