其實一直以嚟，我同好多女仔一樣，都有公主夢，而我嘅公主夢就係好想去天鵝堡影婚紗相，因為我覺得真係好浪漫。去到婚展嘅時候，我見到有間攝影公司準備開一個團去天鵝堡拍攝，我一聽到已經好心動，所以我就坐低咗。不過Joseph Photo就話攝影師新開咗條線，嗰一刻係未知會係邊位攝影師負責，而且如果係我哋會係第一pair去影，所以當時係冇相版睇。嗰一刻我係有猶豫嘅，搵其他攝影師影起碼有個信任，知佢哋啲相係點樣，而且我又唔知佢咃係咪大公司，所以都有點擔心。不過，因為個location實在太太太吸引，我考慮完之後都join咗! 其實佢有俾我揀16年定17年去嘅，最後我哋揀咗就6年十月去。我哋先去德國玩十日先，最後先去影相。不過，影相前一日落雨，之後就真係好擔心，驚第二日都會落雨，幸好佢落咗一陣雨就停咗。而我拍攝當日除咗朝早有少少霧之外，當日係天晴嘅。 我哋分兩日拍攝，第一日先去壁畫村(奧巴馬村) ，再去天鵝堡。壁畫村嗰度滿山紅葉，我影相嗰兩日仲要撞正係紅葉最靚嗰兩日，橙橙地紅紅真係好靚！之後，我哋就去，第一日去天鵝堡，呢個完全係一個公主嘅旅程，真係好夢幻！ 其實出發前，我已經上網睇定邊啲地點影相靚，但攝影師之前應該嚟過睇景，比我更早做晒功課。佢哋都係容易夾嘅，好似我想影啲咩佢都會肯俾我哋影。我係上咗山影先，我哋沿途慢慢行上個天鵝堡度，有一個位係公主最浪漫嘅地方，係堡入面有個大鐘(係可以入去入面)。不過，有啲可惜就係我咁啱撞正天鵝堡莉前面裝修，但幸好瑪麗安橋已經開返有得影。影完瑪麗安橋我先行番上去天鵝堡影，因為我好鐘意坐喺樓梯影相，而攝影師都有因應我要求影樓梯。我喺個大鐘下面跳舞都影到出嚟，有轉圈跳舞嘅相，真係好開心! 加埋套婚紗真係覺得好似公主咁，一路行上去覺得「咦點解好似喺童話裏面咁嘅?」個代入感真係好強烈。嗰度啲人又好nice，喺城堡樓下跳舞影嗰陣其實啲人係讓開俾我哋影。天鵝堡嗰邊就冇咩人影pre-wedding嘅，但係沿途都會見到有。不過我影完落番去行過見到瑪麗安橋嗰陣我就見到已經好多人，但攝影師技術好好，好識就位，D相都冇咩話影到途人。落番嚟嗰陣我係搭馬車落嚟，搭馬車就唔係好貴，三歐羅一個人。途中，攝影師同化妝師都不斷有幫我哋影相，個拉車叔叔都好好人，叫啲人走開俾我哋兩個坐車頭，又好nice咁等啲人走晒都俾我哋兩個自己影一陣。除咗去天鵝堡我又有去到天鵝湖嘅，佢哋都好細心有帶定啲食物例如啲餅咁等我哋可以餵到天鵝，有啲天鵝見到零食係會過嚟，你又可以同佢哋玩，最後真係影到餵天鵝嘅相。 攝影師細Sam好似馬騮，佢好專業，會幫你攞最好嘅角度，同埋佢會行得快啲，可能有啲人就會唔鐘意啦，但係佢係行得比我哋快一截嘅，又會一路沿途同我哋度位影。佢真係好搏，好似有啲高位佢覺得靚，佢唔介意去行少少同我影落嚟。我哋都叫佢唔好咁危險啦，但佢都可以隨身袋住兩三支鏡頭好快上去同我影，都係為咗幫我哋影到靚景，等我哋可以影得晒。同埋佢會就番黃昏magic hour，會提我哋「快啲啦快啲啦」盡量就番時間幫我哋影，佢真係希望客人可以有一份好嘅回憶。 化妝方面，化妝師Joanne臨上機前一日已經問咗我有啲咩係鐘意架，我就同佢講我鐘意用鮮花整頭，佢真係準備得好齊全。拍攝當天，佢攞過嚟嘅嘢真係唔輕，雖然我已經自備嘅鮮花，但佢都有準備一啲仿真度好高嘅假花﹑頭飾﹑仲有好多對耳環俾我。而當日拍攝嘅這型，佢可以整到成個頭好似花環咁樣，我真係好開心。其實我自己都做開婚紗demo，但真係冇諗過有一個人會為咗影個pre-wedding會準備得咁齊全，同埋佢聽到我想要啲咩佢真係會去prepare同去諗，呢樣嘢我真係好驚訝。另外，佢化妝化得好靚，又唔會好厚粉，係一張化妝綿可以印走晒啲嘢，眼睫毛嗰啲唔會重啦。我本身都唔係太鐘意化妝，但係Joanne化到係落妝嘅時候可以咁少，就覺得佢真係落咗好少嘢俾我喎，令到我呢啲咁錫皮膚嘅人覺得個心真係舒服。我都有轉妝嘅，要cool有cool，要sweet有sweet，要童話有童話。 除咗婚紗，我自己有帶多套便服，去到第二日影咗相，中途佢問我哋有冇嘢仲想影，我就話「不如去番壁畫分明村嗰度，嗰度有啲小紅帽好靚」，估唔到佢哋真係個幾鐘頭都陪你去影，冇話影到五點六點就話要收工咁。我都聽過好多朋友話可能要請攝影師食餐飯咁，但係佢哋又冇，影完會話「你哋快啲番去啦我哋搞得掂架喇」，佢哋又唔會去count你嗰一餐飯。有時我問佢哋「你哋食唔食早餐呀」，即係其實都想多謝番佢哋，因為兩日要爬喛爬去又拎住咁多嘢都好攰，除咗攝影師辛苦化妝師其實都辛苦，因為佢又幫我拎住件褸又拎高爭鞋，佢係一直咁幫我。 總括嚟講我會覺得你真係要同化妝師傾，唔好介意佢講你想要啲咩，因為嗰個真係你嘅pre-wedding photo，咁你都想唔係就其他人而係就番你自己，咁我覺得溝通係好重要嘅。即使你搵唔到啲reference photo俾人哋都好啦，都講番你自己鐘意嘅嘢，咁樣你可能會有啲驚喜囉。今次真係一個surprise嚟，都冇諗過佢會帶咁多嘢。另外天氣就冇得避嘅，信任多啲你嘅攝影師啦，就算落雨佢哋都有方法嘅。因為其實我哋第二日朝早係落雨嘅，我哋去咗個瀑布嘅時候係落雨，我都覺得「死啦落雨都影唔到」，但係最後都影到呀，佢有心幫你影嘅話其實一定係靚。 揀相方面都okay，我都估唔到自己揀咗咁多相，都好難揀。佢都有準備到幾張係佢color tune咗同埋未color tune，有啲攝影師係只會俾輯原相你揀，佢就係幫我tune咗少少色先嘅，其實已經有少少唔同，起碼佢哋肯做咗少少功夫先。我嗰度都成800張相，佢要tune 800張相俾我揀，雖然唔係執相，但係佢哋係有heart架，同埋佢哋tune得都快，影完唔知第一定第二個禮拜我已經係有相睇。Tune完相佢都有俾番晒soft copy我，呢個係好難得嘅。我都揀咗幾百張相，都唔少架，但係真係值得，因為呢輯真係好靚！