當初呢個場地係老公上網搵到，我哋上網睇相已經覺得呢度環境好靚，而且最重要係佢喺海邊。不過，我哋去到現場睇，因為場地冇decorate，而我上網睇啲相個場地係佈置得好靚，所以覺得比想像中冇咁好，環境冇網上啲相咁靚。而且因為嗰度係博物館翻新做飲宴場哋，可能都有啲哋方比較舊，而呢啲地方喺網上嘅相影睇唔出。不過，因為喺海邊嘅場地唔係咁多，而且佈置完應該OK，所以最後就決定揀呢度。 我哋擺個房叫「姻园」，我哋擺咗9圍dinner。我對佢哋服務都幾滿意，全程都有個女仔跟住我，都好體貼。佢知我好攰好口渴，會俾飲筒我飲水唔好整花個嘴唇，我一出化妝房佢都跟住幫我拎裙擺裙。唯一有啲唔係咁好，就係當日賓客人數突然有變動，變左有啲檯少咗人，但有啲檯又坐滿咗，令到一啲賓客冇位坐企咗喺度。我啲姊妹又唔知親戚邊個打邊個，於是伴娘去搵場地負責人，請佢幫手數每張檯人數，睇下邊張檯有位，等伴娘可以安排人坐落去。我都明可能係負責人淨係聽我同老公嘅指示，伴娘問完之後兜個圈返嚟發現個負責人咩都冇做仲係企咗喺度！嗰刻我好嬲，唯有我哋自己走去數哂咁多張檯，數完再拍啲人落去，因為已經要開場，仲有兩個賓客企咗喺度冇位坐。伴娘當時都冇即刻同我講，係事後先講返俾我聽話搞掂左。可能負責人唔知我伴娘係邊位，不過我覺得佢都可以過嚟confirm返我哋。 而當晚晚宴食物都ok，本身佢俾鮑片炒啲唔知咩，但之後唔記得咩原因佢幫我哋upgrade咗變左鮑魚，但啲鮑魚好細隻，覺得早知食鮑片好過。我哋仲有個cocktail session嘅，係要加錢先有，我覺得可以改進嘅係食物真係太少同太細份。同埋佢得一張檯仔，變左證婚一完啲人就湧哂過去排哂大隊，好似有少少serve唔切咁。我都聽過幾個friend投訴話cocktail啲野食太少，同埋啲沙律菜唔係咁新鮮。其他野都ok唔錯。另外，個場哋嘅射燈，例如march in 嘅射燈比較弱，如果光D就會比較好！