我喺Facebook搵到Jack，其實本身諗住搵Bob，但因為太貴所以冇搵。我哋都睇咗Facebook上面好多唔同MC，覺得Jack嘅風格比較適合我哋，同埋個樣冇咁「岩杉」。因為Facebook上面好多MC古古怪怪唔正經，有啲太後生又唔夠穩陣。睇到jack履歷，知道佢之前係港台DJ，而且佢有做出面品牌function，商場show嘅MC，睇過佢啲片都覺得佢OK，而且價錢唔貴。 我哋經Facebook inbox聯絡佢，了解咗價錢就confirm。佢big day前係要先收訂金，之後先俾埋尾數金。而big day之前我哋冇特別約出來見面，但Big day前3、4日，佢有打俾我哋，問返相識經過，拍拖嘅歷史咁，開場到入席佢都講返我哋嘅故事，介紹返我哋。 Big day當日佢好早就到，而且有一兩個助手同佢一齊嚟，因為佢都有開班教人做MC。佢準備充足，心中有套時間亦都Control得好好，咩時間做啲咩，講嘢亦都清清楚楚。雖然佢唔係好高大，但係都控制到成個場，大家都聽佢講嘢；亦都有朋友就快結婚都問佢拎卡片，因為都見到佢嘅表現好。