Park Lane早排新裝修，我啱啱係佢新裝修之後擺酒。睇場Confirm嘅時候佢都係舊場，所以我哋行婚展時都未confirm搵佢哋，因為我哋屋企附近有將軍澳Crowne Plaza，又或者Holiday Inn。不過再了解多啲後, 發現都係Park Lane比教符合我哋嘅要求，而且我又唔係擺好多圍，佢咁啱又可以擺到16-18圍，佢仲講話會裝修，我哋就覺得非常好。冇揀Crowne Plaza係因為將軍澳唔係個個都ok，有啲人會覺得遠。同埋我結婚係星期五，我唔想啲人放工山長水遠入嚟飲。而雖然Holiday Inn喺銅鑼灣，地點好中心，住邊都方便去，但佢最多只可以擺15圍，所以都冇揀到。 我啲屋企人，親戚個個都話Park Lane啲嘢真心好食，個場又舒服。因為唔洗同人share場，你知有時大嗰啲酒店係分A B C 廳，可能你係A廳人地就B廳，但係呢度個場就係屬於我哋。有時有啲地方係一個大廳間開幾個，就冇咁舒服。 負責我哋嘅同事叫Terri，係女士嚟嘅。佢好貼心，首先我哋係email聯絡，到睇場嘅時候就face to face傾，傾嘅過程佢都好好，好貼心。其實銷售過程佢哋都冇話游說我哋，都係我哋自己決定想用佢哋。不過佢哋都好好，好多嘢直接同佢哋傾，佢哋都會做俾我哋，例如waive咗開瓶費，同埋場地可以早啲拎佢都會盡做俾我哋。 個場係頂樓嚟嘅，再上就係行禮嘅花園。我哋晏晝行禮，夜晚飲宴。咁啱我哋行完禮先落雨，我都覺得好好彩。空中花園啲嘢係我哋自己set，櫈嗰啲就有嘅，但係另外啲小佈置就自己再加。我哋證婚嘅時候佢都有包啲小食同嘢飲，個個都話啲嘢好食。佢哋新裝修我真係覺得好靚，啲staff嘅服務都好好，如果樓底可以高啲就更好。