我哋輯pre-wedding係我老公個朋友幫我哋影嘅，因為唔想朋友喺我哋結婚嗰日都做嘢，所以就搵過第二個攝影師Patrick。我有上過佢studio面談，第一次見佢嘅感覺係佢好平易近人。佢唔係話講太多嘢，唔會講好多無謂嘢，都係問返我哋自己想要啲咩嘢，講重點為主，我覺得幾好。我哋同佢講我哋想要啲溫馨啲，感人啲，真實嘅style，要自然風格嘅，唔洗話好型格嗰種。 當日我喺自己屋企出門，佢完全唔洗問我點嚟，俾咗地址佢就完全冇煩過我。佢哋嚟到嗰時我化緊妝，佢哋都自動波好熟手咁stand by影下其他嘢咁。我覺得佢哋都有team work同默契，拍video嘅都帶得好好，各樣氣氛都好好。另外，佢哋對老人家都好熱心好take care，好似我哋個會場個台有少少梯級，我見到佢哋都會扶住老人家上上落落，幫佢哋拎住啲嘢。 比較深印象嘅係外影嘅時候，我去完男家之後就喺附近外影，我覺得就算有咁多兄弟姊妹，佢哋都可以令到成個氣氛好輕鬆，做啲動作都好易明，唔會話好自己一套要跟住佢做，可以俾我哋自己發揮，我覺得成個外影氣氛都好好，感覺都好開心，大家都好enjoy。 之後拎到相，我好滿意！特別有印象係註冊宣誓嘅時候自己嘅相，佢係影到我忍住喊又唔喊，最後又喊咗，自己睇返都幾touching，佢都捕捉咗好多呢個moment。其實整體都好滿意好smooth，都有啲覺得超出咗自己開頭嘅預期，真係好滿意。