我認識到JoJo So係因為佢係我先生朋友嘅朋友。JoJo佢真係好體貼，因為我試妝嘅時候佢已經問我有冇鍾意啲咩style，我就話鍾意啲歐美式，當時我都仲未搵婚紗，試完妝我都覺得ok。佢就話叫我一知道自己鍾意咩婚紗，就即刻影俾佢，等佢幫我諗定用個頭點set，用咩頭花，點樣襯。 Big day當日佢係無時無刻都係望住我個樣，不停提醒我俾啲笑容。同埋唔洗講佢自動自覺會幫你影好多相！因為我件婚紗係長拖尾，佢就好主動話會幫我影相，完全係我想要嘅嘢。佢都做咗好多年，至少十年以上，所以經驗好豐富！ 佢take care我之餘都take care埋我媽咪，因為佢幫我化緊妝嘅時候，我媽咪啱啱化完，係佢啲助手幫手化嘅。佢見到我媽咪行出嚟，即刻話：「咦，auntie你叫頭先幫你化嗰個女仔幫你再整整條眉啦！」佢真係極之細心，會留意埋呢啲細節。正常化妝師，淨係得閒理自己嗰個，根本唔得閒理埋人哋，但係佢係會望埋我媽咪同姊妹，同時照顧到咁多嘢。佢當日帶咗三個助手，幫我姊妹化妝嘅都係佢嘅助手，再加佢本人，化哂媽咪同姊妹，佢自己一個就跟我全日。