我哋原本諗住聖堂行禮註冊先，擺酒之後先後補或者唔擺，但就過唔到四大長老嗰關。 長老們話分開2日都唔得，一定要同一日搞掂晒，所以真係好後期成10月尾先開始搵場地。 因為雙方家人都話唔想喺酒樓，想喺酒店擺，我哋就諗咗幾間酒店，但其實嗰時已經比較急，好多哋方都無位。 我哋喺婚享會呢個網度都睇過Eaton、帝京同麗豪嘅comment，見到都唔錯，最後就因為覺得Eaton交通最方便，就決定揀佢。 其實我哋嗰時揀Eaton都係膽搏膽，因為佢哋嗰時做緊大裝修，無得睇場！而且水晶廳已經無咗，得返細場function room。 不過我哋見圍數都夠，就決定喺度擺酒。 Manager Winnie都知我哋無睇過場會好難預計啲decoration，臨big day前2星期其實仲裝修緊，佢都盡量去配合我哋，俾我哋去睇吓場。 之後我哋先去搵decoration，真係好多嘢都好趕！ Function Room嗰度最多17圍，而我地又真係擺足17圍，圍同圍之間真係有啲逼！ 我諗其他新人真係要喺嗰度擺酒就最好唔好擺足，唔係真係幾無位行。另外，唔知係咪佢哋拉電線嘅問題, 個Function Room得一邊有電視。 不過佢哋service好OK，親友們仲特別大讚啲嘢好食！佢哋comment都話啲嘢真係好食，有酒店嘅質素，而當中燕窩係最好食。 原本職員有特別留返啲食物俾我哋，仲送上房叮熱埋，但燕窩嗰道菜最後就俾我啲姊妹食埋～所以我就試唔到喇，有啲可惜。 嗰晚原本佢哋係俾普通房我哋，最後送咗行政套房俾我，空間大啲都方便我擺嘢～