我地一開頭其實都無諗住擺酒，到後來真係要擺嘅時候就想啲地點較方便。之後咁啱搵到My Day，見佢地係新裝修，入面唔需要我地點樣佈置都已經好靚，而且location好方便，地鐵直接去到，唔會唔就腳。我地又唔使擺好多圍，大約係13-14，My Day嗰度對於呢個圍數都好適合，所以我地好快睇完已經覺得啱，就揀左佢地，已經無再點去比較或者再搵其他。 同我地接洽嘅第一位員工一開始嘅時候都好helpful，但去到後尾就隔好耐先會覆我啲問題，甚至乎再後期啲我要打去佢地公司度先搵到佢。之後，因為佢地公司好似有啲轉手定唔知咩野，就換左第二位同事。其實當時我地都好擔心，都驚一轉手唔知之前傾嘅嘢會唔會又要再講過，或者同上一個講嘅野又會有出入，會唔會混亂等等。但好在接手個位都好好，只係去到後尾竟然又要轉多一個接手！其實我地都有啲唔開心同埋唔高興，因為係咁轉人，但最後嗰位同事都真係跟得好好，同埋佢地中間都交接得好好，令到我地安心返。佢之後都有同我地道歉，話唔好意思～公司人手上有啲混亂。我地都感受到呢位同事係好有經驗，佢係連當日啲交通會有咩安排都記得好清楚，擺酒當日好多細節佢又已經一早處理好哂，變左我地都真係唔使諗要點follow up！啲歌我地事前就send定俾佢地，佢地就幫我地做個testing，big day當日最後都好smooth～！ 試菜方面，我地早一年落訂，係到big day兩個月前先試菜～啲嘢都好好味，比我預期嘅好。因為我之前都有朋友去過My seasons，就話啲野食好唔得，不過我地訂西式buffet，質素同效果出到尼都好好。 唯一有一樣我地唔太滿意嘅係佢地嘅partner公司。我地一開頭揀咗個包埋婚紗同男禮，化妝，攝影同video嘅package。我去試妝之後覺得化出尼嘅效果係完全唔得！我本身對啲衫都無咩要求，但去到我真係完全揀唔落手，變左package包咗嘅我完全都唔敢用，全部都要出去搵過第二間。我地都有同My day嗰邊表達返呢啲partner公司真係唔係好得，我地用唔到。佢地就話私下都識人做呢行，可以幫我地問下，但係錢方面就唔可以refund，不過可以計返個價錢送返餐前小食俾我地。我地都覺得如果佢地可以轉過啲partner公司會好好多… Big day當日我地都好忙，跟住我嗰位staff都好好，好有耐性咁幫我執呢樣執嗰樣，好多嘢佢都有提我。當日場地啲staff都好好，服務好同埋跟得好足，唔會話見到都唔幫手，都會好主動咁幫手收碟，感覺都好周到。我印象中當日有位同事叫Frankie都好幫得手，啲賓客都好滿意。對於My Day嘅服務整體都好滿意，無咩可以挑剔～！