我地行婚展時第一間睇嘅就係Vivi Bride，我地入去坐低傾吓睇睇相，佢地都好熱情，感覺都ok。因為我地都無咩準備，佢地態度都好好，會俾我地睇下唔同嘅相，所以我地都無再點比較就搵左佢地。 其實我地本身已經諗好係想去京都影櫻花，佢地當時都好老實咁同我地講佢地之前係無點影過京都櫻花，所以無咩相可以睇，不過我地都join咗佢地。開頭佢地話到出左櫻花期就會聯絡我地confirm幾時影，但係到左12月，我見到都出哂櫻花期，佢地都仲未聯絡我地，我就主動再去問佢地。聯絡之後，佢地就俾左個期我地，但係個期已經係櫻花期完嘅時間！我地有再提返咁遲會過咗櫻花期，不過佢地就話上年都係嗰個時間去影，都無問題。去到後尾我地book哂機票，佢地就話可以早D，但我地衡量過如果要改過哂D野，成本會太大，所以我地就無再改。結果後來去到，今年櫻花期真係早左，真係影唔到櫻花，得返一棵櫻花.......所以都有D失望...... 我地出發之前都有去同佢地開會同埋揀衫。佢地D衫都有分pre wedding同big day衫，但係我地去到試衫就揀唔落手，因為D款都好舊，比較老土....最後我都係自己去左第二間度租衫帶去日本嗰邊影。 因為我地有香港攝影師同化妝師同我地一齊過去，所以溝通上都無問題，而且佢地都好friendly。化妝師手勢好好，個妝化出尼係自然得尼個輪廓又會出到。如果個陣我未搵化妝師，都會想搵佢化big day～真係化得好好。 雖然影唔到櫻花係比較失望，但係影相過程同啲相都比想像中好，影出尼效果我地都好滿意。特別要讚返佢地售後服務好好，員工態度好好，好有手尾，約實揀相日期後會再喺前一日出reminder去提醒我地。揀相個陣完全無hardsell，唔會突登打亂D相俾你揀，又無chur我地，俾我地自己慢慢揀，無催同埋俾壓力，唔錯。