我哋會揀迪士尼嘅最主要原因係我老婆Midco佢由細到大都好鐘意米奇老鼠，佢儲咗好多迪士尼嘅嘢。另外一個原因係我自己好鐘意車，所以想喺我哋嘅婚禮裡面放部車，而香港可以放到車入去嘅酒店真係唔係好多間，我查過得迪士尼、會展，Marco Polo，九展。

至於點解要放架車真係講返少少故事。事源係我同我老婆都好鐘意周杰倫同頭文字D。嗰時我有個朋友機緣巧合下知道我哋兩個都鐘意周杰倫同埋頭文字D，就借機會穿針引線同Midco講到有個男仔朋友有架AE86，我哋就係咁認識咗，一拍即合，所以呢架車對我哋兩個黎講係好有代表性！所以我哋都好想婚禮裡面可以有呢架車。

其實嗰時我哋除咗搵迪士尼，係同會展嗰邊傾咗成半年嘅時間。但會展嗰邊就一路都只係叫我哋睇下場或者係其他嘢，而唔想正面幫我哋處理呢件事。我都明佢係event為主，banquet收入就次要，所以會提高啲要求令我哋難啲fulfill，但係最重要係佢哋表現出嘅感覺係唔會好想幫我哋解決呢個問題，只係想我哋自己放低呢個想法。

相反，迪士尼嘅員工Vicky就好好，俾我個感覺係就算最後唔得都好，都會話俾我聽。我覺得佢好有誠意，又會幫我哋諗吓，例如提議可能放個大cardboard得唔得，非常有心同盡責，感覺上真係盡力幫我去諗，呢樣做得好好。我哋都知頭文字D其實係另一套卡通，唔係好應該放入迪士尼，但係佢哋真係堅持幫你夢想成真嘅信念，所以佢聽完我哋嘅故事之後，就俾我哋放呢架車入去。我哋真係好感恩有Vicky幫手，真係幫助我哋好大好大忙，其實好多嘢如果無咗佢都唔係咁易做到！

婚宴前一晚，大約係12點幾左右，我哋就去睇場同settle架車，因為我要放咗架車入去佢哋先做到佢哋要做嘅嘢，真係要好多大家嘅配合。我見啲同事set場都set得好認真。特別係我老婆同咗Nicole講想喺main table放佢儲咗好多年嘅唔同嘅米奇水晶，啲同事真係好用心咁set到main table好靚，同我哋用嘅cinderella theme好夾，係超過我老婆嘅想像～！佢哋嘅LED大屏幕backdrop我老婆見到嗰時都好surprise，好靚，效果好好。

當晚食物全部都有讚無彈，特別係米奇老鼠嗰個甜品，有啲賓客特登攞住嗰盒嘢黎同我老婆講真係好好食，叫佢都食一件，而且送到上枱都仲好熱！我哋仲為啲了朋友預備咗Kid’s menu，有burger有意粉。個burger好大，啲小朋友好開心，而且因為個burger好大，好多父母都要幫手食，連啲大人食完全部都話想自己另外加多個burger！我諗真係好好食！有客人同我講話覺得啲嘢比起four season仲好食！好多客人都話酒店個空間咁大，無諗過啲嘢上到枱會夠熱又好食。

唯一小問題係賓客feedback返放喺台左手邊嘅3D mapping蛋糕比較大，遮住個Monitor，睇唔到個螢幕裡面發生咩事先。佢哋如果想拍片影想就唔可以坐喺位度，一邊食一邊拍，一定要走出黎先睇到。

我哋覺得所有同事嘅服務都好好。嗰晚婚宴完咗之後，Nicole成12點幾點1點仲喺度，等啲同事幫手拆晒啲嘢，我哋先可以攞走架車。我哋都唔好意思，要佢哋留到咁夜，而且嗰晚間我見佢成晚都無坐過，真係辛苦佢哋！嗰晚又好多片好多歌要播，佢哋都好professional，好多嘢都幫到我哋。個Monitor同backdrop都幾靚，影相出黎質素好好。

成件事我哋覺得最緊要就係佢哋真係實踐咗迪士尼嘅slogan「一個實現夢想嘅地方」！呢樣真係好真，真係實現咗我夢想嘅婚禮，好多朋友黎到見到架車都好驚訝！我哋都知道迪士尼regional有好多guideline要守，但同時佢哋都會俾好多suggestion我哋點樣可以過到，好感受到佢地嘅熱誠！成個wedding俾人感覺得好特別，我哋都知係比佢地平時一般嘅婚宴係複雜咗，但佢哋嘅服務真係好好，好用心。真係好滿意，無乜地方可以挑剔！