其實起初我都無諗過一定要去迪士尼，不過因為12月3無乜期，好多clubhouse同洒店都搵唔到，後來就搵咗Disney。嗰時佢哋嘅同事Carmen同我講嗰日好旺，下午3點好難俾時間我，不過lur咗幾日之後，佢就好好有打返嚟話有場地，但個plan B就好差，會ballroom都無，得返餐廳嘅一個細area。嗰時我都仲心大心細，覺得佢地個草地好靚，但係又驚會落雨，最後我媽咪話應該唔會落雨，所以就決定照去！

Disney嗰度主要有三個可以證婚嘅area，因為有成200個客人，所以我就要咗最大嗰個場West Lawn，係一個最大嘅草地！我去睇咗場2次，簡直係愛上咗嗰個地方。我好鐘意嗰度有樹有森林，而且我哋嘅客人之中都有好多小朋友，佢地可以跑來跑去玩。 證婚當日最突發嘅係個我個wedding planner佢一上台個mic system就壞咗！嚇死佢～結果搶救咗15分鐘先搞掂返。另外可能場地太空曠，有啲客人都話我用咗咪都唔係太聽到我講咩。而且場地附近係無新娘房，佢俾咗一間附近嘅房我哋用戶，要行上行落就辛苦啲，唔係太方便。最好嘅話當然大啲就會好啲，唔使輪流換衫同化妝～

我最後都好滿意撐揀咗Disney呢個地方，空間夠，而且有戶外嘅花園，但我地就無要到啲Characters，因為我老公唔鐘意咁cartoon，所以就唔想要Minnie同Mickey。Music band我都搵咗出面嘅，其實好多嘢都係自己喺出面搵人去做，連Disney都覺得好奇怪。不過中間唔用佢地嘅brand都會有啲難度，佢地有好多guideline都幾rigid，例如我想要士多啤梨蛋糕，唔想要芒果蛋糕，都問過佢地點，但就唔可以轉，又唔可以準備自己嘅蛋糕。不過我又唔會話太介意個蛋糕，所以OK，我諗都要睇啲新人接唔接受呢啲限制。小朋友拋嘅唔可以用假花，一定要用鮮花，同埋唔係用佢哋嘅人，唔可以有任何Disney嘅歌或者公仔出現，要尊重返佢地嘅場地指引，我哋都覺得應該嘅，咪喺限制之下做我哋嘅其他改動。後期我哋傾咗好耐，最終佢哋都肯俾我哋請咗個魔術哥哥嚟表現魔術，可以entertain到成五十幾個小朋友。唯一requirement係要佢著西裝唔可以著小丑裝，襯返場地style，魔術哥哥又OK。好在嗰日有魔術哥哥同埋我哋整咗個popcorn機，好多小朋友都好開心！

整體嚟講迪士尼嘅服務都好好，同事都OK，特別Kelvin我有問題打去搵佢都有盡快覆返我。食物嘅choice同酒店比係唔夠多同埋無酒店咁flexible，但係客人feedback都話質素唔錯，服務聽講都好OK，成件事我都覺得good～雖然我哋只係下午證婚，但佢哋都俾我地自由喺酒店嘅area度影相，真係唔錯～只係我同我老公都太攰，最後只係影咗一陣。