我喺IG見到Vivienne C，見到佢嘅風格係我想要嘅比較自然D嘅淡妝，就約咗上去試妝。雖然佢只係我第一間去試妝，不過佢做到哂我想要嘅嘢，所以我當時就已經決定落訂～佢幫我化個妝真係好貼，同埋佢非常體貼。試妝嗰排我額頭全部都係紅印，但係佢係好細心咁幫我慢慢遮，所以我都無再試其他！

Big day當日，佢幫我set好頭之後就問我「不如唔好整個紅花，感覺好老」。因為我都好信佢嘅意見，所以我就同意唔整。不過因為我D長輩就好堅持一定要個紅花🌺，所以佢都好配合我同我D長輩要求，幫我整返紅花上去。

外影嗰陣，佢一見到我頭髮有少少亂，就即刻嚟幫我整返好，確保我每刻都係好靚。佢轉妝都好快，連Club One個D人都話「嘩！咁快就轉完」😜 因為佢知道我好多親戚朋友，要好多時間影相，所以佢都好好👍🏻，好快咁幫我整好等我可以影多D相。同埋每次轉完妝出嚟，個個都讚好靚～個妝又好貼。