我哋當初都係諗住好簡單，晏晝擺酒，而去到婚展就見到 Hong Kong Disneyland 做緊晏晝宴會promotion。佢哋個offer好好，又有埋Wedding Planner，好多嘢都會幫你處理好哂。另外，晏晝可以擺酒嘅酒店選擇上都唔係好多，我哋比較完之後都係覺得其他嘅酒店比起迪士尼呢種配套嚟講都係貴，所以就揀咗迪士尼。嗰度場地本身已經好靚，出面大部份酒店、酒樓都唔會包場地設計，但係佢哋本身個場地已經好靚，Reception或者係Backdrop，所有嘢都會幫你安排哂，唔使再額外花心思。

佢地整個過程都follow得好好，email或者whatsapp聯絡上有好多嘢都會update我哋。我哋本身都有好多唔同意見，好多嘢都想喺婚禮度做到，但係佢哋都會好好，聽哂兩邊要求，再提出D建議，睇下點樣可以配合到兩邊，又會provide其他方法俾我哋令到件事smooth D。不過因為晏晝只係可以揀Sleeping Beauty Ballroom，變咗圍數上就限制咗，最多只可以16圍，我哋都擺到盡呢個數。有D人聽到迪士尼都話想嚟，但係最後都係請唔到，因為16圍個場地真係盡晒唔可以再加。

到Big Day嗰日真係個個都讚，我哋雙方父母都話好正、好好。氣氛都好好，開頭都會諗晏晝擺酒氣氛會唔會無咁好，好似平時食餐晏咁，但係出到嚟個效果好好，真係做到簡單而隆重。我哋揀咗中式，因為西式係要早D confirm人數，但係因為我哋都不停喺度改，所以就唔得。而且自助餐，D人就會行嚟行去，如果要影group photo就會好麻煩，所以都係無揀到。D賓客都話諗住晏晝D嘢食會普通D，但係都唔係，同夜晚一樣咁豐富，好好食，我哋都幾surprised！

我哋嗰日有請Disney公仔嚟，個個見到都好開心，又有得影相。佢哋仲有offer埋棉花糖同埋popcorn俾我哋，D小朋友都好開心。除咗棉花糖同埋popcorn，都可以安排埋小朋友餐，佢哋講返話好好味同埋兩個小朋友食都食唔哂，真係俾人覺得佢哋會take care埋D小朋友，D有小朋友嘅guest都好開心。因為Lunch佢地fix咗12pm-2pm，包括埋註冊時間，如果佢哋個時間可以flexible D就更加好，但係我哋都要多謝返佢哋，最後佢哋調動到，都幫我哋安排到時間上面有D改動，令到我哋最後都有好sufficient嘅時間。整體真係好滿意，個Wedding Planner真係好好，同埋真係感受到佢哋係用心去幫你處理問題。