我哋係喺婚展認識到Sky100嘅，咁同時都有睇緊其他酒店同去site visit過，比較咗價錢同環境之後覺得Sky100會特別啲，所以就揀咗佢哋啦😊。我哋係喺Sky100擺cocktail，嗰度係分zone嘅，咁我哋就租咗一個zone，本身預100人，但最後都嗌咗170人參加，所以就喺一個月前同佢哋再租多一個zone啦。佢淨係俾咗我哋揀嘅A,B zone area俾我哋，其他遊客係可以照上去其他zone，但入唔到嚟我哋嗰度嘅。一開頭係第二個sales跟我哋嘅，但中途轉咗Jonathan同Sanni跟我哋，咁我哋就再上去參觀個場，佢哋都已經提出話開個whatsapp group，咁有啲咩都可以方便問，而且佢哋都覆得好快👍🏻。因為我哋之前都係用email溝通，咁好似有啲咩要問都要特登draft個email，咁開咗whatsapp group就方便好多，我哋可以send啲相俾佢哋，佢哋又再send返啲相俾我哋睇下試出嚟嘅效果係點。之後佢都有再約我哋上去，試下啲相同音響效果。佢哋處理事情都有好彈性，例如喺big day前一個星期就問我哋洗唔洗提早一日擺定啲物資過去，唔洗我哋搬嚟搬去，都幫咗我哋好多。同埋個場地係落地玻璃，啲賓客都讚個場好靚🥰。不過如果佢哋個台可以有埋斜嘅台階就更加好啦，因為我爸爸係坐輪椅唔係咁方便上落，或者其他長輩坐輪椅嘅話都可以推上去影張相啦。不過唔緊要，我哋最後都係喺台下影相嘅，不過有埋就更加好啦😆。