一開始我哋就想搵擺cocktail嘅地方，之後上網睇到Sky100就覺得佢哋特別啲，無咁公式化，容納到嘅人數多啲，又有個景睇咁，所以就揀咗佢哋啦😊。我哋搵佢哋問嘢佢哋都好responsive，有咩要求佢哋都會儘量配合。有Elaine同Lorenza兩位同事負責我哋嘅婚宴，佢哋好貼心，一開始email都有主動同我哋講話有咩vendor嘅資料都可以俾佢哋，佢哋就會幫我哋搞掂。最後佢哋同啲vendor嘅聯絡都做得好好，我哋就可以煩少樣嘢喇👍🏻。佢哋嗰度個景好靚，再加上我哋好好彩, 嗰日好好天, 所以就更加靚啦。親戚朋友都有讚好特別，因為佢哋大多數都無上過Sky100，都可以趁呢個機會上去睇下。

Sky100係同Ritz-Carlton合作開嘅，就喺Sky100樓上，所以我哋都揀咗佢哋嘅catering，啲嘢食都好食又特別，唔會淨係得三明治仔咁😋。有個小插曲，老婆嘅阿哥嚟樓下泊車嘅時候，樓下嘅保安好似好惡咁，話要三點半先有得泊，嗰陣係三點十分咁，佢就唯有泊住喺路邊先，但個保安又係咁話佢阻住人，想趕佢走, 其實佢啲態度如果可以好啲就好喇...🙊