我原本識Victor Lam Photography嘅另一個partner，係佢介紹Victor Lam比我哋嘅，佢話Victor Lam係之前影開雜誌，佢依家影嘅嘢好detailed，所以我哋就咁決定用佢哋2P1V嘅big day攝影啦😊我哋有上佢哋IG睇啲相，佢哋兩個攝影師嘅風格好唔同，幫我朋友影嗰個攝影師影嘅angle會廣啲，睇一個大圍嘅感覺；但係Ｖictor就係好細膩嘅，我哋收返啲相係真係好似影雜誌咁，唔會將兩個人完整咁擺入框，而係focus喺兩個人嘴嘅笑容，又有張我老公攬住我條腰嘅相，所以出到嚟就有幾種風格，我好鍾意啊😆

因為我自己唔太傳統，唔識做啲儀式嘢，又無請到大妗姐，最貼心係攝影師佢哋仲幫我哋做埋大妗姐嘅角色，講啲祝賀說話，又教我斟茶嗰啲，幫我哋run晒成個過程。見人哋啲相好似好易咁，但係其實背後係要做好多嘢，譬如我要䁥喺間房唔可以開門俾我老公。佢哋好多經驗，會好清晰咁話俾我聽依家要影我啦，我就要點樣做，等我知道做緊咩。影相嘅時候佢哋會俾好清晰嘅指示教我哋擺pose，帶動住成個流程。

不過因為我哋唔知，以為送完客走我哋就可以走，所以我哋返咗房落妝，點知佢哋三個有留低打算喺草地度幫我同我老公影多陣相，佢打俾我問我先知，佢哋真係好上心，仲特登留低幫我哋影，可惜我已經落咗妝就無影到啦。睇返啲相的確係比較少淨係我同老公兩個人嘅相，因為一行入草地已經好多屋企人坐喺度，見證簽紙嗰陣又有律師喺度。佢哋有提出可以補少少錢去佢哋studio補返，但係一路都無特別約，或者等我大肚先再去影啦😝

Big day嗰日天氣好，所以影出嚟效果好好，係我哋想要嘅嘢。Victor嘅風格同普通攝影師唔同，佢好睇details，有一張相好令我印象深刻，係我同老公企喺度俾人望住好尷尬，最後我緊張咁捉住咗我老公嘅手指尾，但係佢竟然capture到，我都唔知佢影咗，同埋佢會影我哋背面，影出嚟真係好自然，我好鍾意嗰啲相啊😍