當初係我屋企人提議喺城市花園酒店擺酒嘅，佢哋之前去過人哋婚宴，話啲嘢食好好食。其實我都有比較過好多間，但係最後都係prefer嘢食方面嘅口碑，所以就揀咗呢間啦😆。之後去過睇場，雖然對比其他酒店係細咗啲或者無咁grand，但係我覺得係啱啱好適合我哋嘅圍數，坐落唔會迫狹。初初咁樣睇可能覺得會細咗啲，但係最後出嚟嘅效果好好啊。佢哋嘅同事同我介紹，解釋得好清楚，同提我有啲咩要留意，佢哋之後仲會搵日特登開一次會講一次rundown同交低返佢哋需要啲乜。

印象最深刻係結婚當日佢哋會報告返有啲咩情況發生，點樣解決咗，同埋經理一直都follow up得好足。其他嘅員工好friendly好有禮貌，我之前去過朋友嘅婚禮對比過就覺得佢哋服務好好。其實有幾個經理跟我哋嘅婚禮，其中一個會專門follow返圍數問題同出面嘅情況，等我可以安心啲，我無諗過佢會交代我哋呢啲嘢。進場同敬酒嘅時候就有同事跟住我哋，好照顧我哋🥰。

賓客都讚個場好舒服，佢哋好鍾意，尤其係嘢食佢哋覺得好食又精緻，覺得啲菜式好特別，唔同出面酒樓嗰啲。通常結婚嗰日係無咩時間食嘢，佢哋好貼心，會特登留返啲嘢食整返熱送上酒店房俾我哋食😋。不過佢哋個場會有啲細，我原本諗住擺啲影即影即有嘅機，佢哋出面有個位，如果可以extend到出面擺就更加好啦。新娘房空間會有啲細，淨係容納到同化妝師坐喺度咁，所以最後我都無用到，佢哋另外安排咗隔離嘅麻雀房俾我化妝換衫。如果佢哋可以裝修下，擴張下啲地方就好啦。我覺得佢哋服務好好啊，性價比又高，我會介紹俾著重嘢食同圍數適合嘅朋友🥳。