我地係婚展接觸到Arlene Wedding，睇過佢地既相之後覺得幾符合我地鍾意既style，偏向自然風，唔會過分調色。我地想以旗袍為主題影一輯，Arlene Wedding好配合到我。一開始佢地既同事已經好似朋友咁同我地傾計，感覺舒服。

揀衫既時候我無經驗，同事都幫我揀到我鍾意同合適既衫，過程好快好順暢。正式拍攝前一日同事會幫我地final fit, 我試上身真係覺得改得好合身😍，唔怕影相既時後會穿崩。攝影師Bobby係事前都俾左好多意見我地，我提出想影既地方之後佢會幫我規劃，揀衫方面都俾左意見我。

拍攝前一日落大雨，同事即刻問我地需唔需要改地方，要改既話佢地會配合而且唔洗收費，好貼心👍🏼。不過最後好好彩，拍攝當日好好天，我地影到好多相。Bobby真係好專業，每個地點都搵到好多唔同既背景影相，而且非常快就可以影曬一個地方，令我地可以去齊曬港九新界既景點影相，呢點做得幾好。我地唔識擺pose同表情，攝影師同化妝師既默契幫左我地好多。Bobby叫我地望左邊，但可能我地唔知望邊個角度，化妝師千千就會舉手/放低手指示我地要望既位，令我地好自然就影到想要既效果，佢地真係合作得好好🤩🤩。

佢地既package會比較划算，包左好多野，例如big day衫同晚裝無限任借，媽媽衫同褂都有，如果媽媽衫可以包多幾件就更好🤔。Package仲包左big day攝影，佢地既好處係可以安排返我地想要既攝影師俾我地，唔會求其assign 另一個攝影師俾我地。我地同Bobby 夾開就唔想轉第二個。不過我地係Big day前一個禮拜先通知佢地因為疫情所以改期，真係非常唔好意思。但Arlene Wedding既同事都願意配合，仲幫我hold住我揀左既裙，唔洗擔心其他人有無hold 左呢啲問題🙌🏽。