我本身唔鍾意啲太誇張嘅style，而且我想影studio加外景，ewedding嘅服務package同相片風格比較接近我想要嘅嘢，同埋佢哋調色方面唔會話太味精😊。

拍攝之前ewedding同事會同我哋做briefing, 了解我哋想去邊個地方拍攝，我同先生平時都鍾意跑步，所以我哋想特別少少，着返平時嘅運動衫影相，而佢哋就會suggest我哋去石澳拍攝， 有我鍾意嘅海之餘，亦有跑步嘅元素。如果briefing再清晰啲就好喇，不過佢哋都跟得好足，時時WhatsApp提點我，但係佢同事有啲多，如果集中一兩個同事負責會比較好🤔。

我覺得攝影師阿White好好，雖然我哋冇特別指明，不過pre wedding 同 big day 都咁岩係佢😍。阿White知道我哋唔慣影相會好緊張，佢專登喺studio嘅時候，同我哋warm up, 會隨着我哋嘅情緒嚟調整拍攝嘅方向，又會指導我哋點擺pose, 所以我覺得我哋同攝影師好夾！影pre wedding嗰日仲有個好醒目嘅攝影師助手，周不時會提點我哋，好幫到手，仲會做晒動作咁教我哋點樣擺pose, 我覺得佢都好好👍！

因為我影Pre wedding同big day嘅日子相距好近，佢哋嘅同事阿Steve 好盡力咁樣幫我哋夾期拍攝，最後都順利完成。而且執相嘅同事技術真係好好，每一張相都好獨特，睇相簿嘅時候會覺得有唔同嘅感覺🤩。