我之前係老公細佬嘅婚禮已經見過羅總監，而我奶奶更加係對佢有讚冇彈，我結婚嘅時候都專登再request話要搵佢。我奶奶咁鍾意佢梗係有原因啦，佢真係好符合一個專業大妗姐嘅形象。

首先係禮貌同談吐都令人好滿意。所有流程、吉利說話都係佢帶起，十分流暢之餘，好識掌握節奏，清晰知道邊段時間應該講咩。應變能力高都係有目共睹，例如係媽咪中途喊、跌嘢，都可以講到啲好說話圓場。

我個rundown整得好趕，好多人都話會overrun，但係羅總監佢成功調動時間，令到件事順利完成。 另外羅總監好盡責，隨身帶住個百寶袋，入面真係咩都有。例如係飲管，唔係話幾支就算，而係成袋。男家當日有幾十人，啲飲品飲管好快就唔記得邊個打邊個，而我當日好忙都係全靠佢得閒就比水我飲，又會預備埋食物比我，怕我餓親。佢跟得真係超足，我去廁所又會等我，換褂又會係附近。對我嘅rundown好清楚，又知道點同其他人溝通，佢係度真係好安心。

除咗當日之外，其實佢事前功夫都做得好足，有時一啲我無book到佢嘅服務問佢佢都會好樂意解答我，例如安床同過大禮呢啲，佢仲會比啲片我睇，問佢嘢又會即時回覆，而且佢比嘅建議好幫得手好完美。