我最初接觸到芳姐佢哋，係因為我其他商戶有推介，話覺得佢哋嘅服務都唔錯。我了解過background，做過功課之後都幾滿意，於是我就指定左要返芳姐幫我去做當日嘅大妗姐。

當初我都係直接聯絡佢，傾吓當日嘅流程。第一次聯絡佢係婚禮嘅一年前，佢已經好詳細咁同我講究竟有啲咩需要注意。就算我哋唔join佢過大禮嘅package，佢都會回答我哋相關嘅問題，非常體貼同唔吝惜。😉

之後我哋都有再出嚟見一次面，不過後來疫情嘅關係多數都係用電話溝通。即使係用電話溝通同埋相隔咗一年，芳姐都會不斷update唔同嘅資訊俾我哋知，又會同我哋講邊一日要準備啲乜嘢等等。芳姐細心到會幫我哋諗得深遠啲，例如佢知道有啲酒店唔會提供切乳豬嘅刀，佢就會自動自覺幫我預備埋。芳姐真係好有先見之明！相信都係因為佢做大妗姐嘅經驗真係好豐富，知道唔係間間酒店都會為新人準備好多嘢，佢就未雨綢繆。🤣

婚禮當日，朝早嘅時間芳姐都管理得好好，完全知道晒我想要啲乜嘢。關於中式嘅禮儀，我哋依啲後生點會知呀，好多嘢都係靠芳姐打點。有時發生咗啲小插曲，例如打爛野跌嘢啊，芳姐都會即刻執生，講好多吉利嘅說話。🙈甚至乎佢發現到我哋習俗上有一啲錯誤，會提出更正，不過佢唔係好惡咁話我哋唔啱，只係好婉轉咁同我哋講點樣可以再做好啲。😌我哋嘅長輩都係比較注重禮儀嘅，芳姐就係正正知道明白長輩關注嘅究竟係乜嘢位，佢都可以游刃有餘咁處理得好好，所以大家成個過程都係開開心心嘅。