拍拖嘅時候，你可能俾對方嘅外表同性格吸引，大家相處無咩問題～ 但係結婚之後，有人會叫苦連天，覺得大家好難相處同磨合，結果就係日日上演世界大戰⋯⋯ 點解有啲人可以結婚十年如一日，仲好似初戀咁恩愛？點解有啲人日日鬧交，沒完沒了？即睇婚姻保鮮法，態度決定高度，一齊營造舒適嘅婚姻環境！
文：婚享會編輯部｜圖：網上圖片
1/ 情緒管理＋即時溝通！
曾聽身邊唔少朋友講過，同另一半相處，若有不滿嘅話要即日解決，千祈唔好抑壓情緒～ 無錯，喺一段舒服嘅關係入面，穩定嘅情緒同及時溝通都相當重要！千祈唔好抑壓自己嘅情緒，以為過咗就無事，其實有問題／不滿就要即刻講出嚟，如果雙方一直抑壓，往後只會有更大嘅情緒爆發～ 為免鬧交，當你好嬲嘅時候，不妨俾少少時間自己冷靜落嚟，食一啲你鍾意食嘅嘢，又或者做一場運動出一身汗，然後慢慢諗清楚成件事嘅源頭，再同對方作出溝通！
2/ 唔好只係諗自己，學習從對方角度思考～
一段婚姻入面，如果對另一半不滿時，唔好發嬲住，可以換個角度諗一諗：另一半咁做，可能由於佢唔善於溝通，亦可能因為家庭背景或者因為長輩影響～ 既然大家最想都係解決問題，不如企喺對方角度諗，咁就可以更容易諗到成件事點處理會更好！
3/ 世事無「理所當然」～ 常存感恩嘅心！
由我同你，變成我們，背後真係有好多故事同經歷～ 所以即使你結婚後已經習慣咗一段感情，都千祈唔好覺得乜嘢都係「理所當然」，要識得感恩，多謝對方嘅付出，咁先可以更珍惜彼此！
4/ 要愛人，必先要好好愛自己～
記住！要愛人，必先要好好愛自己～ 喺一段關係入面，千祈唔好迷失自我，其實你自己嘅感受都係非常重要㗎！所以最重要，係你同另一半都可以正面互相表達感受！
5/ 適當嘅自由空間
結婚後大家都應該有適當嘅自由空間，要學識尊重另一半嘅生活方式，千祈唔好名義上為佢好，而加強自己嘅控制慾！只要能夠令對方喺關係中感到自由同開心，咁先可以令發展更健康、長久～
6/ 雙方妥協，欣賞優點接受缺點
記住妥協永遠係雙方，而唔係只有單一方妥協！二人磨合嘅關鍵，在於自己夠唔夠包容，去面對同接納對方嘅一切～ 只要做到欣賞對方優點，同時更要接受、包容對方嘅缺點，先可以令感情持續升溫！
7/ 共同成長，一齊走更遠嘅路！
一段好嘅關係，可以互相激勵，令大家共同成長，成為Better Me！所以千祈唔好盲目要求對方不斷進步，但自己卻原地踏步，只要大家一齊努力，呢段關係先可以走得更遠！
✨籌備婚禮由此囍✨全港最大的婚禮評語網站 Bespoke Wedding 婚享會，集齊最新結婚資訊😍即睇每月精選結婚優惠及獨家非凡禮遇🎁兼賺里數換蜜月機票攻略： www.bespoke-wedding.com/
