各位準新娘子，見到金價真係要大嗌一聲「Wow」！金價由上個月 5,500 美元嘅「天價」玩笨豬跳，竟然曾經插返落 4,500 美元水平！ 呢啲咁嘅「金」喜真係可遇不可求。
身為要睇住荷包、又要體面過大禮嘅精明新人，而家絕對係「入貨」嘅黃金窗口！
📉 第一步：金價「大降」時 —— 唔好諗，衝大件！
當見到金價「插水」嗰陣，就係入手「重量級」金器嘅最好時機。
-
專攻目標： 龍鳳鈪、五隻細金豬、大金牌。
-
精明位： 呢類大件嘢最食金價，金價跌 10%，一對鈪隨時幫你慳返成皮嘢，夠你喺婚禮度多加一個 Candy Corner 或者將攝影 Package 升級！
-
姊妹 Tips： 趁跌市入舖頭，記得問有無「工費點計」。金價跌 + 工費減，呢啲先真係抵到爛！
📈 第二步：金價「回升」時 —— 避重就輕，買細件！
如果之後金價反彈，千祈唔好因為驚再貴而盲衝，要權衡返自已結婚預算與家人或另一半商量
-
戰略轉移： 改買金耳環、金戒指、細金鍊。呢類「輕金飾」即使金價貴咗，總數都唔會差太遠。
「金豆」大法： 一早使用「月供金豆」，每個月買 1-2 粒，拉勻個平均價。升市嗰陣分批入，好過一次過喺高位「接火棒」。
🧮 第三步：問清「練金公式」—— 咪畀個「平」字蒙蔽！
買金飾，入舖頭前一定要自己計一次呢條數：
最終出門價 = (飾金價 × 重量) + 佣金 + 手工費
-
陷阱位： 有啲舖頭會趁金價跌嗰陣加高工費，所以唔好淨係睇金價，要睇埋個「工費折扣」先係真道理！
推薦做法： 揀一啲通花或者 3D 硬金款式，睇落去夠大對、夠體面，但其實重量相對輕，係小資族喺高金價時代嘅救星。
🌟 金價有升有跌，但幸福絕對保值！
講到底，無論金價係大跌價定係回升到天價，買唔買金、買幾多，其實都係你哋兩個人嘅選擇。
如果你哋係傳統派，想趁低入貨攞個好意頭兼保值，咁而家呢波跌勢絕對係天賜良機；但如果你哋崇尚簡約，覺得將呢筆錢用嚟裝修新居、甚至係去多場快閃旅行更實際，咁其實「輕婚禮」一樣可以好浪漫。
買金飾嘅初衷係長輩嘅一份祝福，亦係兩個人建立新家庭嘅其中一種方式。金價會變，但你哋對未來嘅共識同嗰份喜悅，係幾多錢都買唔到嘅。 最緊要係揀一個最令你哋舒服、唔會造成壓力嘅方式去籌備婚禮！