當日sell我哋嘅同事都唔會話特別hard-sell，影pre-wedding前佢都有俾指示我哋，例如揀衫佢俾咗本小冊子我哋，入面有講到有咩要做同埋唔好做。另外租衫方面啲款就似乎少咗啲，但都叫新，所以最後都算揀到。 到咗影相當日我哋係一早去到嗰度準備，成個流程都幾smooth。我哋係影完室內景先影外景，影室內景嘅時候一直都算順利，不過之後我哋去咗海灘影外景，可能因為有海浪聲，環境又比較嘈，加上都有少少距離，可能有時唔係幾聽到攝影師講咩，攝影師成日要嗌可能就會有少少脾氣。當時都有三對新人，可能都比較多人同埋環境真係太嘈，所以我都明白係會有少少燥。影完之後我哋就去咗1881影，但出到嚟嘅相就麻麻哋，可能燈光問題同埋人流都比較多，所以效果都唔係咁好。 之後揀相都要等兩個月，當日係我妹妹同我上去揀相，嗰位同事喺我哋揀緊相嘅途中有黑面，可能我哋討論嘅過程都比較揀擇，當時佢嘅語氣同埋態度都唔係咁好。佢又冇刻意要我揀相，我當時都幾決絕，可能佢都會提議話「呢張都幾好」，但係我真係唔鐘意所以冇揀到，佢有少少hard-sell嘅地方就係會sell你加五千幾蚊做埋coating，我本來係唔想要，但佢不停咁sell我，所以最後都係逼住要咗，不過我覺得coat咗分別好似唔大。 諗番起佢話製作都要個幾月，中間可能都有好多嘢要修改，咁佢哋都算幾快手。之後攞相我哋就係直接上去攞，我放咗工盡早過去（佢哋收八點），我記得大家都好似好趕時間咁，好快俾咗啲嘢我哋驗完貨就走。