當初我哋都有問吓朋友意見﹑格過價，然後shortlist咗三間，最後都係覺得Kenji影出嚟嘅嘢比較啱我哋，而Kenji吸引我哋嘅係佢嘅攝影風格，佢主要係負責影snap，而影snap係比影group photo難，因為要喺唔影響對新人嘅情況下影到佢哋最真實嗰一面，真係需要一定功力先做到；另外同佢傾完之後都覺得佢為人比較低調同埋比較靜，唔會不停咁sell你，而係真係俾你靜靜哋咁睇佢影嘅相，你有問題佢亦都會答你，所以係好俾到信心我哋﹗ 另外就係big day當日係需要有個人好熟悉當日嘅程序﹑控制到個場面，因為新人同兄弟姊妹都唔會話有太多經驗，變咗好多流程上嘅嘢都要靠攝影師，Kenji喺呢方面都比較多經驗，加上當日佢個partner都好professional，控制場面好好，好多賓客加上我爸爸媽媽都覺得好輕鬆。其實好多攝影師都會好cool，淨係會好生硬咁指示新郎新娘，我明白要做得足其實唔難，但要做得好就要靠攝影師嘅功力同埋佢哋隊team嘅teamwork。 Kenji即使喺我哋未落單之前佢已經俾咗好多advice我哋，我哋係有見面傾過rundown嘅，佢俾咗好多意見我，例如斟茶要幾耐﹑每個姊妹要負責啲咩﹑計番有幾多個親戚要影預番時間，最後成個rundown都冇甩漏；又好似當初我係冇諗住著褂，佢就同我分享番佢自己經驗，話我知著褂出到嚟個感覺係會比起著西裝或者其他造型好好多；又同我哋分享揀化妝師有咩要注意，可能要有啲造型去配合番攝影師咁。呢啲advice可能係老生常談，當然大家都想嗰日自己係最charming，影出嚟係最靚，但有啲好細微嘅嘢真係要注意，可能有時相機影出嚟會出唔到隻色﹑又或者用完閃光燈會變咗色，呢啲嘢可能大家都會aware，但係如果唔講出嚟影出嚟效果就未必完美，所以俾意見呢方面佢好幫得手，跟得好仔細! 整體嚟講Kenji同佢partner同賓客嘅互動係非常之好，佢哋好識搞氣氛，我最記得嘅係連小朋友都可以catch到佢哋attention，好似會有啲小道具例如「小手板」呢啲道具去吸引小朋友望鏡頭，真係唔係個個攝影師都可以做到咁！做到咁真係唔簡單，要有heart先做到! 另外當日成隊crew嘅氣氛係好融洽，大家有講有笑咁，我都feel到佢哋做嘢係真係好開心嘅。 諗番起有關播片，我哋喺揀佢之都有睇過佢啲作品嘅，覺得佢早拍晚播嘅手法都唔錯（有啲攝影師會將一啲細節例如玩遊戲嘅過程fast-forward帶過就算），佢嘅攝影同埋表達手法都比較西方，似外國風格，整體我都幾滿意。而當日我有俾surprise我太太，就係自己拍咗個video，同班兄弟拍咗個跳舞嘅MV，當中都有同Kenji溝通過，等佢可以就番角度捕捉到我太太睇片時嘅反應，最後喺video同相度佢都有捕捉到，睇返都覺得好難忘。 真係好多謝Kenji喺big day當日好用心幫我哋捕捉每一個時刻，又好有心幫我哋影啲特別效果嘅相（例如影戒指，佢影完一次覺得唔太滿意就問我哋可唔可以借俾佢影多張），雖然我哋當日冇咩機會交談，但係真係好多謝佢咁用心咁敬業樂業，整體嚟講Kenji真係好有heart同埋服務係物超所值。 最後就係可能Kenji份人比較靜，可能有啲嘢要你主動去問，唔係好易產生誤會，雖然我覺得大家之間都係要靠一份信任，但係如果佢可以再outspoken啲就更好喇。

記得攝影師既時候都真係幾辛苦，都睇咗好多間而見間間都差唔多無咩特別，最後見到Kenji嗰間先真係覺得啱心水。我哋始終唔係好熟程序係點，咁Kenji都好好advice我哋啲細節，期間都仲見多兩次傾當日流程例如出門點樣預時間﹑玩遊戲同埋證婚嘅時候角落點樣影會靚啲等等，好多嘢都真係唔講唔知。 我哋係喺九龍灣Club One擺酒而個場地Kenji之前都去過所以好熟個場。我都知影相光源對攝影師黎講都幾影響，而場裡面個大台projector嗰個位好容易影得太暗或者太光，但佢就掌握得好好，始終熟個場既floorplan，知道喺邊到set燈會最後，所以整體都滿意。 Kenji個人好有禮貌，當晚有啲賓客遲咗未影而晚宴都差唔多到尾聲，咁啱個主攝行開咗而Kenji當日其實係負責影snapshot既，當時要Kenji頂幾張都會即刻行過嚟幫手而一啲都無所謂。 我都有介紹俾我朋友，因為我覺得佢價錢合理﹑帶動到氣氛同埋整體感覺都好舒服，唯獨就係要預多少少時間俾Kenji交相，我哋都真係要三個月到先收番哂所有相，如果可以再快啲就最好。 我有一個好深刻既印象就係當時Kenji走埋嚟問我哋攞對戒指，跟住見佢圍住對戒指氹氹轉，响啲紗布到擺嚟擺去，到最後見到將相咁靚先知佢原來當時咁用心幫我哋影對戒指留念，而真係對每一張相都咁執著。