當時係婚展見到嗰啲發覺間間都差唔多，而當時上網睇到Bluebird 啲相發覺佢地取景角度都幾特別，特別係佢哋 tune 相 tune 得好靚，咁就決定見吓佢哋。當時見Kenji 佢俾咗好多reference我哋望，我問佢pre-wedding同big day如果都搵佢可以平啲嗎？佢都話okay～ 影pre-wedding真係好忙，大家都不停周圍走﹑Kenji一路指導我哋笑同埋點擺pose咁，其實當時都唔知會影成點，但係睇番啲相又幾靚。化妝方面有一個頭就set得唔係咁靚，其實我當時係冇留意到，之後睇番啲相覺得點解唔同咗咁，原來係Kenji photoshop同我推高番個頭！好在有佢咁樣幫我執一執，執咗就真係好返好多，都幾大分別。 Kenji有啲地方都做得幾細心，除咗提到佢幫我photoshop之外，因為我當時無準備花球，Kenji 就為我準備咗一個俾我用，效果都唔錯，顏色都幾襯我套衫。 佢個package本身係有包衫，但係啲衫唔係好啱我，我自己另外搵，而佢都真係好均真，都肯退番$2,000俾我。 景點方面都有好多選擇，我哋有啲地方好想去影而都佔咗好多時間，最鍾意就係我去返我老公間中學影。其實都只不過係學校一間，但係影出嚟就真係好靚。夜晚我哋就無乜所謂，就 Kenji 話去邊就去邊，但估唔到係短短一晚都影咗好多地方。可惜最後唔夠時間去西環泳棚影，因為我哋過咗海同埋嗰日天氣唔係幾好，想去嗰陣已經天黑喇。

其實攝影師我哋喺big day嘅一年前已經搵咗，當時我哋一次就book晒prewedding同big day。嗰時我哋上去同佢傾嘢，雖然佢遲咗到，但都算幾有心機同我哋傾。最初一開始我哋會揀佢，係因為佢同我哋講，唔緊要呀，你有意見嘅就同我講啦，你想影咩都可以傾，又有sell自己影相技術好。我哋見佢都肯商量，就confirm咗用佢。我哋嗰時真係點都估唔到，呢個竟然係我哋成個Wedding裡面嘅污點。 我哋係12月結婚，大約到7至8月左右我哋先去影prewedding。我哋之前傾嗰時佢話會幫我哋plan個prewedding行程。我哋見佢放出嚟啲相都好吸引，都覺得如果個prewedding全個係由佢哋安排影到咁出嚟嘅話我哋都OK，所以其實到影之前幾日我哋都覺得無問題。不過，到差不多要去影之前，我老公見5月嗰時係雨季，就去問下佢如果到時落雨點算好同confirm prewedding當日嘅行程，嗰時就開始覺得佢有啲問題。我老公同佢一confirm行程，佢就話呢度封咗，嗰度又落雨，結果差唔多全部嘢佢都無同我哋去安排咁濟，同佢一開始講嘅完全唔同。我哋都明白天雨問題無得控制，但係一改行程就改到全部唔同晒，我哋真係覺得好奇怪。至於佢同我哋傾嘢嘅態度都唔同咗好多，同未攞到個booking confirmation前好熱衷嗰種態度係好唔同！聯絡佢嗰時佢通常只係覆我哋一兩句OK或唔OK之類，冷淡好多。 到咗影相嗰日，我哋一早同佢講咗我哋要去城門水塘度影相，但係唔知佢係無申請定點，我哋因為無許可證，要徒步行入去影相。我哋之前就係聽人講過話入城門水塘影相要申請許可證先可以入車入去，所以差不多9個月至1年前已經向佢提出過。當時我哋都無challenge佢哋係做唔到定無安排，但嗰時起更加覺得有問題，最慘嘅係影出嚟啲嘢都唔係我哋想要。我哋其實一開始好清楚同佢講咗我哋唔想要風景畫，強調一定要影到有樣，但好不幸地最後出嚟啲相九成都係花花草草，啲相剩係見到風景多過人。我老公佢放咗啲相上Facebook之後，連佢啲朋友都問「幅相入面嗰個係咪你嚟㗎？你係邊呀？」，我老公只可以好無奈咁答「嗰粒嘢咪我囉」，你可以想像到有幾風景畫。雖然佢影嘅風景的確係好靚，但就完全唔係我哋想要嘅嘢嚟。其實唔止我老公啲朋友，連佢啲同事睇完都話啲相真係有啲問題，唔似係專業攝影師嘅水平。然後影嘅時候，我哋好有印象喺一個電車站度轉咗廿幾個圈。嗰度有盞燈喺後面，佢話想catch到轉燈，我哋想像都會影到好靚，都好合作。到揀相嗰時，我老公見唔覺有嗰度啲相，就話「咦？唔係有度轉咗廿幾個圈㗎咩？」，佢就話「係呀，嗰度啲相死晒，一張都無得揀。」。嗰刻我哋真係覺得好荒謬，啲相死晒到底係佢影嘅技術有問題定係其他原因，佢完全無解釋，就咁話死晒無得揀。我哋原本好期待，點都估唔到連一張都無得揀。雖然我哋真係好嬲，但因為怕同佢嘈完big day嗰日影衰咗會更唔開心，而且又俾晒錢唯有逼住忍佢，嗰時都下定決心打算忍埋big day。 到後來，朋友俾咗啲意見我哋話既然都俾咗錢就好嚟好去，或者試吓買盒嘢上去。於是到我哋有次再上去confirm big day rundown嗰時就真係買咗盒嘢上去，點知我哋上到去送完盒嘢，佢就只係「哦～係呀？」然後就將盒嘢放埋一邊，真係好嬲！然後佢同我哋傾run down嗰時都唔係好認真同詳細咁同我哋傾，不停改我哋嘅rundown，話「就咁啦，11點左右就影完，下午好曬就3點鐘先再開始影，其他無咩特別，你仲有咩問題丫？」，連之前問過佢同confirm過嘅嘢好多再同佢傾都原來係無confirm到。之前佢同我哋sell嗰時就話乜都得，到做嗰時就乜都唔得。傾完rundown搭車走嗰時我真係好唔開心，都忍唔住喊，我唔明點解我哋俾錢買個service會搞到咁，改我哋個rundown改到唔同晒樣，啲態度又唔當我哋係客人咁，嗰刻真係好難過又擔心咁樣big day嗰日點算。 嗰時已經係大約9-10月左右，而佢嘅態度同行為都令我哋好難對佢有信心。我哋嗰時就諗，如果佢到big day嗰日之後同我哋講啲相死晒，佢賠返啲錢俾我哋都無用㗎，始終big day嗰日真係過咗就無，於是我哋就決定都係要撻訂。其實父母嗰邊都會反對，因為都唔係細筆數。不過不幸中之大幸係我哋初頭同佢拗咗好耐話big day 嗰日未進行，個service又未收到，係唔應該俾晒全數，如果唔係咁嘅話，我哋咁樣撻訂就應該真係全數都無晒。我哋嗰時係擔心如果嗰日佢唔show up咁點算，所以先喺尾數呢個問題上企硬，我記得佢嗰時聽完都有唔鐘意，但最後都俾我哋喺big day前一日或者當日先俾支票，估唔到呢個後著都叫做幫我哋留返少少錢。 我哋決定好之後，就喺Whatsapp度同佢講「到時嗰日你唔使嚟㗎喇，麻煩晒你， 嗰日嘅時間你可以自己安排返」，最令我哋估唔到嘅係佢竟然覆我哋一句「祝百年好合」，完全無問原因就完咗！我哋之前都諗住佢會問吓點解，我哋兩公婆都傾過吓點答，點知佢最後乜都無問，我哋真係好愕然！我哋都覺得如果係一個專業嘅攝影師，最起碼都會問一句「點解會咁呀？」了解吓點解無咗個客丫，佢嘅回應真係令我哋覺得佢係特登整走我哋去食我哋訂。雖然佢未必話對每個人都差，但佢當時令我哋覺得佢好熟手，我哋都未必係唯一有咁嘅遭遇嘅新人。 我哋將呢個review打上嚟，係因為見過好多新婚嘅朋友仔成日都因為啲vender service唔好，但又唔想收到最後個product唔係想要嘅所以啞忍。我自己之前都見好多人會喺網上forum度share返啲感覺，就係唔開心嗰時都盡量唔講，為咗希望之後個product會係想要嘅嘢。但係為咗一生人一次嘅big day真係要諗清楚，我哋都希望呢篇評論幫到你哋。