天澄閣嘅場地首先啱我擺嘅圍數，價錢合理，性價比高，之後我哋上去睇場已經覺得個場地好靚，寬敞同樓底高，所以就揀咗喺佢哋度擺婚宴啦😍。睇場嘅時候，佢哋嘅員工介紹得清晰詳盡，我問嘅嘢都可以答到，睇得出佢哋基本上已經好熟悉所有嘢，唔洗話再要去睇下先。

有個同事係專門跟我哋嗰case嘅，所有嘢都跟得好足好好，而其他好多場地係無呢樣嘢嘅。我哋平時係用whatsapp溝通，佢哋覆得超快啊，真係有問必答，就算我好夜問佢哋都會覆到，好上心好負責任🥰。如果有啲咩唔夠清楚佢仲會問可唔可以打俾我同我講，好快手。佢哋有refer咗間印帖嘅公司，我有comment同天澄閣講，佢哋就會去反應返俾間公司，之後係真係會改善到👍🏻。

Big day嗰日有個姐姐會跟住我，我march in同證婚分咗兩次進場，我唔知要點做，佢就會提我幾時要做啲咩，之後上臺斟茶嗰陣佢又會幫手鋪裙，每張相都會幫手鋪。影大合照嘅時候有個小插曲，我跌咗個金耳環，姐姐全程好focus我所以見到，佢唔講我都唔知，真係好犀利，我私底下都有同佢哋再讚多次個姐姐啊😇。

不過我就覺得佢哋offer上嘅彈性可以再多少少，因為最近有疫情同社運，我自己無改到期，見到周圍好多間公司都可以改期，但係天澄閣就好後期差唔多2月佢哋先話可以免費改，但係就要改2020年內，咁佢哋得返嘅期就無咩得揀，所以就算有得免費改都未必改到今年內，佢哋如果喺呢度應變得就可以更加好啦😣。同埋佢哋原本有話夠25圍送mc、deco同間房，原本我一定夠25圍嘅，所以就簽咗要呢啲服務，但係因為疫情問題最後就唔夠25圍，我係最尾個禮拜先confirm到少咗咁多圍，變相佢哋就要收返我嘅mc、deco同間房嘅錢，雖然條款嗰度有寫明要夠圍數先會送，都明白係因為個疫情，不過真係有啲無奈🥺。

我嗰陣10日前confirm佢係20圍嘅，但係咁嘅形勢日日都有人同我講唔嚟，搞到我5日前先再同佢哋講要cut到17圍，好彩佢哋照俾我cut，因為見出面confirm咗就無得減，又或者要留菜，佢哋就處理得彈性好多，呢樣嘢好好🥳。賓客有comment返啲嘢食同服務好，開開心心食咗餐。天澄閣本身有紅磡站來回嘅shuttle，但係呢個位置對於好多人嚟講會無咁方便；同埋佢哋中間嘅主場可以擺到廿幾圍，擺得多就要開偏廳，但係嗰度有啲位係望唔到臺，排位嗰陣就會麻煩啲，坐得都會逼啲，所以如果鍾意地鐵站上蓋同多圍數嘅新人就唔係咁啱啦。

我一開始無睇過婚宴場地嘅，不過我嘅同事去過天澄閣所以介紹比我，我之後再去睇場，覺得嗰度嘅樓底高、場地無柱、整體乾淨，圍數方面又ok，所以無比較過其他就揀咗喺佢哋度擺晚宴啦😆。

經理Terry好幫到手，平時係我同佢whatsapp溝通，big day嗰日因為我成日要去轉妝換衫，所以佢就全程跟住我先生，有啲咩就可以搵佢，幫手處理咗好多嘢。仲有個assistant會全程跟住我，又會幫手扶埋媽咪同奶奶上台，好take care著長裙嘅人。佢哋對於疫情好快已經準備咗酒精消毒機，又即刻訂咗體溫機，入場前要量一量體溫，幫我哋處理好，大家都唔洗咁擔心🥰。

有少少美中不足嘅就是佢哋餐飲會包橙汁同紅酒，但係紅酒就要開席先可以飲，有啲人嚟到已經想飲嘅時候就要等🙈。不過嘢食方面，賓客都讚好食啊，雖然我哋無食到，但係Terry都幫我哋打包好兩份俾我哋完場食返，好貼心啊。有朋友結婚我都會介紹天澄閣俾佢哋，佢哋環境舒服唔會壓迫，嘢食好食，價錢又合理，鍾意高樓底同感覺寬敞啲嘅新人就好適合佢哋啦🥳。